Таван жил тутамд зохион байгуулагддаг Хятадын Коммунист Намын (ХКН) 20 дугаар их хурал Бээжин хотын Ардын их хурлын танхимд 10 дугаар сарын 16-ны ням гарагийн өглөө эхэлсэн. 

Өнөөгийн Удирдагч Ши Жиньпин нь ХКН-ын Төв хорооны ерөнхий нарийн бичгийн дарга, БНХАУ-ын дарга, ХКН-ын ТХ-ны цэргийн төв зөвлөлийн дарга гэсэн гурван албан тушаалыг хашдаг юм. Тэрбээр 20 дугаар их хурлыг нээж өөрийн сүүлийн 5 жилд хийж хэрэгжүүлсэн ажлаа тайлагнан улс орныхоо ирээдүйн улс төр, эдийн засгийн ерөнхий төлөвлөгөөний талаар танилцуулан илтгэл тавьсан байна.

Тухайлбал, Тэрбээр өөрийнхөө ажлыг хүлээж авсан 2012 оноос хойш хэрэгжүүлж байгаа авлигын эсрэг ажил нь үр дүнгээ өгч нам, улс төрийн хүрээний өндөр албан тушаалтнуудтай холбоотой асуудлыг илрүүлэх, хариуцлага тооцох ажил үр дүнд хүрч байна, цаашид ч энэ ажлыг боловсронгуй стратегиэр явуулахаа хэлсэн.

Мөн өнгөрсөн 10 жилийн хугацаанд ХКН-ын үйл хэрэг болон Хятадын ард түмэнд маш чухал ач холбогдолтой, түүхэнд тэмдэглэхүйц гурван томоохон үйл явдал болсон.

1. ХКН-ын 100 жилийн ойг тэмдэглэн өнгөрүүлсэн

2. Хятадын онцлогтой социализмын шинэ эринд орсон

3. Ядуурлаас бүрэн ангижран чинээлэг дундаж давхаргыг бий болгосон.

Энэ бол ХКН Хятадын ард түмний эв нэгдлээр олсон түүхэн ялалт бөгөөд дэлхий дахинд асар их нөлөө үзүүлсэн үйл явдал юм” хэмээн Ши Жиньпин онцолсон байна. Үүний зэрэгцээ “НЭГ УЛС ХОЁР СИСТЕМ” зарчим цаашид өөрчлөгдөхгүй талаар ч тайландаа дурьджээ.

Өнгөрсөн 10 жилийн хугацаанд дэлхийн 140 гаруй улсын томоохон түнш болж, бараа худалдааны салбарт илүү гүнзгий, нээлттэй байдлыг бий болгосон. Хятадын ДНБ 54 их наяд юаниас 114 их наяд юань болж өссөн, дэлхийн эдийн засагт тус улсын эдийн засгийн эзлэх хувь 7.2 хувиар өсөж 18.5 хувь болсон байна.

Түүнчлэн ирэх 5 жилд, Ковид-19 цар тахлыг тэглэх хатуу бодлогын нөлөөгөөр эдийн засагт хямрал нүүрлэсэн ч эдийн засгийн өсөлтийг шинэчлэхийн тулд боловсрол, инновацид илүү анхаарал хандуулж, БНХАУ-ын хувьд шинжлэх ухаан, технологийн салбарт бие даах чадвараа нэмэгдүүлнэ. Мөн ХКН энэ шинэ эринд Тайваньтай холбоотой асуудлыг шийдвэрлэх ерөнхий бодлого хэрэгжүүлж, улс орноо нэгтгэх, үндэсний эв нэгдлийг бэхжүүлэхийн төлөө тууштай хүчин чармайлт гаргана хэмээн Ши Жиньпин хэлжээ.