ОХУ-ын Эрхүү мужид нүүрлэсэн үерт нэрвэгдэж орох оронгүй болсон иргэдэд зориулан Березовой тосгонд 2500 шинэ байшин барина гэж тус мужийн амбан захирагч Сергей Левченко амлалаа гэж РИА Новости агентлаг долдугаар сарын 14-нд мэдээллээ. “Тулуны үерт нэрвэгдсэн Березовой суурингийн иргэдэд зориулан орон сууцны зориулалттай 2.5 мянган байшин барина. Иргэн бүрт 15 сот газар хуваарилна” гэж мужийн амбан захирагч хэлжээ.
Үүний зэрэгцээ Уголщик сууринд орон сууцны тохилог байшин барина гэсэн байна. Энэ бүх ажлыг амжуулахад жилээс багагүй хугацаа шаардана гэж тэр онцолжээ. Ингэж байгуулах шинэ суурингуудыг сургууль, эмнэлэг, хүүхдийн цэцэрлэгтэй иж бүрэн байгуулна гэсэн байна. Харин үерийн усанд автсан бүсийг ойн цэцэрлэг болгох юм байна.
Зургадугаар сарын 25-наас Эрхүү мужид усархаг бороо орж Бирюса, Уда, Ут, Ия, Икейка, Кирей голуудын усны түвшин эрс нэмэгдсэнээр гурван мянга гаруй хүн нэрвэгдэн 450 хүн эмнэлэгт хүргэгдэн 25 хүн амь эрсэдсэн юм.