Украины Ерөнхийлөгч Владимир Зеленскийн гурван автомашин бүхий цуваа Запорож мужид хүүхэд тээвэрлэж явсан автобусны цуваатай мөргөлдсөн осол гарсан ч азаар хэн ч бэртэж гэмтээгүй хэмээн тус улсын төрийн хамгаалалтын албаны эх сурвалжаас эш татан “Страна.ua” сайт мэдээлсэн байна. Автобусны цувааг хөнгөн тэрэгнүүд гүйцэж түрүүлснээс осол гарсан гэж урьдчилсан байдлаар тогтоогоод байгаа юм байна. “Автобусны цувааг Ерөнхийлөгчийн цувааны хоёр Volkswagen Touareg болон аюулгүйн албаны автобус гүйцэж түрүүлсэн” гэж сайтад бичсэн байна. Ерөнхийлөгчийн цуваа Киев рүү буцаж, Зеленский харин онгоцоор нийслэлийг зорьжээ.
Хэвлэлийн эх сурвалж Украины тэргүүний цуваанд жолооч хүрэлцээгүй байснаас болсон гэж онцлоод Ерөнхийлөгчийн албанд 30 жолооч байдаг ч тал нь ажиллаж байгаа. Ийм болохоор хүн дутагдалтайгаас жолооч нар уртасгасан цагаар ажиллаж нойр муутай явсан нь осол гарахад хүргэсэн” гэжээ.
Украины Ерөнхийлөгч долдугаар сарын 13-нд Одесст болсон усан боомтуудын хөгжлийн асуудлаарх зөвлөгөөнд оролцсон юм.