Москвагийн Думд нэр дэвшсэн хараат бус нэр дэвшигчдийг нэрсийн жагсаалтад оруулахыг шаардсан иргэд Оросын нийслэлийн төвд эсэргүүцлийн жагсаал хийж байна. Хотын захиргаанаас зөвшөөрөл аваагүй жагсагчид эхлээд Новопушкины талбайд цуглараад дараа нь Москва хотын захирагчийн ордон руу чиглэжээ. Цугларагсдын өмнө хотын депутатад нэр дэвшээд байгаа Дмитрий Гудков, Любовь Соболь нар үг хэлж Москвагийн сонгуулийн хороо тэднийг дэмжигчдийн гарын үсэг дутуу хэмээн нэрсийн жагсаалтаас хассанаа тайлбарласан байна. Цуглаанд оролцогсод чанга яригч ашиглан үзэл бодлоо илэрхийлсний дараа Илья Яшины уриалснаар Тверийн гудамжны хоёр талаар явж, хотын захирагчийн ордон руу чиглэжээ. Жагсагчид “Энэ бол манай хот”, “Бүртгэ”, “Собянин огцор” гэсэн уриа хашхирч явсан байна. И.Яшин бас жагсагчдыг хотын захирагчийн ордны хаалгыг бэлгэ тэмдгийн байдлаар тогшихыг уриалсан бол Соболь бүр ордонд нэвтрэхийг уриалж байжээ.
Москвагийн Сонгуулийн хороо есөн хүнийг нэрсийн жагсаалтад бүртгэхээс татгалзсаны дотор хараат бус нэр дэвшигчид байгаа юм.