Долдугаар сарын 14-ний өдөр Гүржийн хэсэг иргэн Азербайжаны нутагт байдаг Давид-Гарежийн сүмийн цогцолборын дэргэд Азербайжаны хилчид рүү халдсан хэрэг гарсан байна. Бакуд суугаа Гүржийн Элчин сайдыг Азербайжаны Гадаад хэргийн яаманд дуудаж энэ халдлагын талаар ярилцсан гэж яамны эх сурвалжаас аван мэдээллийн Trend.az агентлаг дамжуулжээ. Азербайжаны Гадаад хэргийн яам Гүржийн талаас энэ хэргийг мөрдөн шалгаж, үр дүнг нь Бакуд албан ёсоор мэдэгдэхийг шаардсан байна.
“Энэ хэрэг Азербайжан, Гүржийн хоорондох стратегийн түншлэлийн эсрэг үйлдэл болж, хоёр орны харилцааг сэвтүүлэхэд хүргэх өдөөн хатгалга боллоо хэмээн харамсч байна” гэж Азербайжаны Гадаад хэргийн яамны мэдэгдэлд дурджээ.

Азербайжаны хилийн алба ч Гүржийн талаас ийн халдсаныг баталж байна. Тэдний мэдээлснээс үзэхэд халдлага хилийн “Шемкир” отрядын “Кешикчи гала” заставын хамаардаг нутагт болсныг хилчид аюулгүй байдал сахиулах арга хэмжээг шуурхай авснаар тун удалгүй намжжээ.
Гүржийн тал хариуд нь хэргийг мөрдөж эхэлснээ мэдэгдээд үйл явдал Азербайжаны нутаг дахь сүмээс бурхны хөргийг нь авснаас иргэд дургүйцсэнээс үүдэлтэй гэсэн байна. Гүржийн Гадаад хэргийн яам үүний зэрэгцээ “Хугацаанд нь яриа хэлэлцээрт хүрэхийн тулд хилийн зөрчлийг шалгах комисс тайван нөхцөлд ажиллахад туслах”-ыг ард иргэдээсээ хүсчээ. Гүрж, Азербайжан хоёр улс 400 гаруй км газраар хиллэдгийн бараг гуравны нэг хэсгээр өнөө болтол тохиролцож эцэслээгүй байдаг юм байна. Ийм маргаантай газрын нэг нь энэ Давид-Гарежийн агуйн сүм цогцолбор юм. Баку үүнийг Кавказын дурсгалт газар хэмээн Кешикчидаг хэмээн нэрлэдэг байна.