Олон улсын валютын сангийн тэргүүн Кристин Лагард Европын төв банкны захирлын албанд нэр дэвшиж байгаа учраас албан тушаалаасаа огцрохоо мэдэгдлээ гэж тус сангаас мэдээлэл түгээсэн байна. Түүний албан тушаалаасаа огцрох нь ирэх есдүгээр сарын 12-нд хүчин төгөлдөр болох гэнэ. Энэ хүртэл тэр хэдийгээр өөр албанд нэр дэвшээд байгаа ч түүний шийдвэрээр хэрэгжиж байгаа ажиллагаанууд үргэлжлэх ч өөрөө ОУВС-гийн үйл ажиллагаанд оролцохгүй юм байна. Түүний мэдэгдсэнээр бол ийм шийдвэрийг сангийн ашиг сонирхлын үүднээс гаргасан гээд “Энэ нь миний залгамжлагчийг томилох явцыг түргэсгэнэ” гэжээ. Лагард бас шинэ захирал томилох ажлыг Удирдах зөвлөл ойрын үед ярилцах байх, тэр хүртэл Дэвид Липтон сангийн захирлын үүрэг гүйцэтгэгчээр ажиллана гэснийг РИА Новости агентлаг эш татжээ.

Кристин Лагард ОУВС-гийн ажил амжилттай байгаад талархал илэрхийлээд “өөрийн нь удирдлага дор тус сан гишүүн орнууддаа амжилттай тусалж, дэлхийн санхүүгийн хямрал болон, түүний үр дагавраас гарахад нь дэмжлэг үзүүлсэн” гэсэн байна. ОУВС-гийн мэдэгдэлд шинэ захирал олох ажлыг тун удахгүй эхлүүлнэ гэжээ.
Кристин Лагард 2011 оны долдугаар сард өмнөх тэргүүн Доминик Стросс-Кан хүчингийн хэрэгт холбогдон дуулиан болж, албан тушаалаа өгсний дараа ОУВС-гийн захирлаар сонгогдсон. Францын Эдийн засаг, санхүү, хөдөлмөр эрхлэлтийн сайдаар ажиллаж байсан түүнийг Их Британи, АНУ, Энэтхэг, Бразил, Орос, Хятад, Герман зэрэг нөлөө бүхий орнууд дэмжсэн юм.
2016 оны хоёрдугаар сарын 19-нд ОУВС-гийн Гүйцэтгэх зөвлөл Кристин Лагардыг хоёр дахь удаагаа дахиад таван жил Сангийн тэргүүнээр ажиллуулахаар санал нэгтэй баталсан юм байна.