Болгарт хакерууд Татварын албаны сүлжээнээс таван сая орчим иргэний орлогын тухай хувийн мэдээллийг хулгайлсан хэрэгтэй холбогдуулан тус улсын Ерөнхий сайд Бойко Борисов Үндэсний аюулгүй байдлын зөвлөлтэй шуурхай зөвлөгөөн хийлээ гэж тус улсын Үндэсний радио мэдээлсэн байна.
Болгарын хэвлэлүүд даваа гаргийн өглөө оросын нэг Веб-сайтын хаягнаас болгар иргэдийн нэр хаяг, орлогын тухай мэдээлэл бүхий файлууд хүлээн авсан юм байна. Энэ “илгээлтдээ” хакерууд Болгарын Сангийн сайдыг огцрохыг шаардаад, Орлогын асуудал хариуцдаг агентлагийн мэдээллийн санг эвдлэн таван сая гаруй иргэний хувийн мэдээллийг авснаа мэдэгдсэн байжээ.

Болгарын Засгийн газар АНУ-аас хэд хэдэн сөнөөгч F-16 онгоц авахаар шийдвэрлэсэнтэй холбоотой халдлага байх гэж Болгарын Дотоод хэргийн сайд Младен Маринов мэдэгдэж байна. Харин Сангийн сайд Владислав Горанов болохоор хакерууд Татварын албаны нийт мэдээллийн гурван хувийг л хулгайлсан гэжээ.