Украины парламент буюу Дээд Радагийн ээлжит бус сонгууль энэ сарын 21-нд болсон. Сонгуулийг саналын хуудасны 50 хувийг тоолсны дараах байдлаар тус улсын Ерөнхийлөгч Владимир Зеленскийн “Ард түмний зарц” нам 42.45 хувийн санал авсан байна гэж Украины Сонгуулийн төв хорооноос мэдэгдлээ. Харин “Амьдралын төлөө-Сөрөг хүчний платформ” 12.8, Ерөнхийлөгч асан Петр Порошенкогийн “Европын эв нэгдэл” нам 8.64, Ерөнхий сайд асан Юлия Тимошенкогийн “Эх орон” нам 8.01, дуучин Святослав Вакарчукийн “Дуу хоолой” нам 6.38 хувийн санал тус тус авчээ. Ийнхүү урьдчилсан байдлаар Дээд Радад таван нам суудал авахаар болоод байна.

Энэ удаагийн ээлжит бус сонгуульд нийт сонгогчдын 36,6 хувь оролцож санал өгчээ. 2014 онд болсон сонгууль шиг энэ удаа ч Украинд холимог системийн парламентын сонгууль явагдлаа. Сонгуульд 22 нам, зургаан мянга гаруй нэр дэвшигч өрсөлдөв. Нийт 225 нэр дэвшигч намын жагсаалтаар парламентад суудал авах бол нэг суудалтай тойргоос сонгогдсон нэр дэвшигчид 199 суудал авах ажээ. Дээд Радад 450 суудал байдаг. Оросыг баримтлагч салан тусгаарлагч Донецк болон Луганск мужийн зарим газарт, 2014 онд ОХУ-тай нэгдсэн Крымын хойгт сонгууль явагдаагүй учир 424 депутат сонгогдоно.
Владимир Зеленский өнгөрсөн тавдугаар сард Ерөнхийлөгчийн үүрэгт ажилдаа орсны дараахан Дээд Радаг тараахаа мэдэгдсэн.