Японы Ерөнхий сайд Шинзо Абэгийн тэргүүлдэг эрх баригч эвсэл ням гарагт болсон парламентын дээд танхимын сонгуульд ялалт байгуулсан хэдий ч нийт суудлын гуравны хоёрыг авч чадаагүй учир Үндсэн хуульд нэмэлт өөрчлөлт оруулах гэсэн итгэл найдвар биелэх эсэх нь эргэлзээтэй боллоо. Либерал Ардчилсан намын эвсэл болон Комэйто намаас гадна бие даагчид, сөрөг хүчнийхэн нийт 81 суудлыг авчээ. Ингэснээр эрх баригч эвсэл өрсөлдөөнгүй суудлын тоотойгоо нийлээд парламентын дээд танхимд 160 суудалтай болж байна.
Эрх баригч эвсэл дээд танхимын нийт суудлын гуравны хоёрыг авч чадаагүй буюу олонх болоогүй тул Абэ Шинзо 2020 онд Үндсэн хуульд нэмэлт өөрчлөлт оруулах зорилгоо биелүүлэхийн тулд сөрөг хүчний дэмжлэгийг авах хүндхэн даваатай тулгарч байна. Японы Төлөөлөгчдийн танхимын 245 суудлаас эрх баригч намууд болох Либерал Ардчилсан нам 57, Комэйто нам 14 суудал, нийт 71 суудал авснаар тус танхимын 124 суудлын төлөөх сонгуульд ялжээ.

“Бид улс төрийн тогтвортой байдалд суурилсан арга хэмжээг үргэлж дэмжинэ. Мөн үүн дээр тулгуурлан бид улс эх орны ашиг сонирхлыг хамгаалах, дипломат ажиллагаа явуулах болно. Бид ард түмнийхээ итгэлийг даахыг хүсч байна” хэмээн Абэ хэлжээ. Шинзо Абэ 2021 оны төгсгөл хүртэл ОХУ-тай энх тайвны гэрээ байгуулахыг хүсч байгаа тухайгаа мэдэгдсэн билээ. Түүний бүрэн эрхийн хугацаа 2021 онд дуусна.