Латин америкийн Венесуэльд асар их хэмжээний нутаг дэвсгэр хамарсан цахилгаан эрчим хүчний тасалдал гарч нийслэл Каракас хот, нутгийн баруун, зүүн хэсгийн 23 муж гэрэл цахилгаангүй боллоо гэж El Nacional хэвлэл мэдээллээ.
Даваа гарагт нүүрлэсэн харанхуй сүүлийн нэг жилд тав дахь удаагаа тохиож байгаа цахилгааны саатал юм. Цахилгаан тасарснаар нийслэлийн метро бүхэлдээ зогсчээ. Венесуэлийн Мэдээлэл харилцааны сайд Хорхе Родригес энэ саатлын шалтгааныг “цахилгаан соронзон дайралт” байж магадгүй гэсэн байна.

Хамгийн анх энэ оны гуравдугаар сарын 7-нд тус улсын 21 мужид гэрэл цахилгаан тасарч хэдэн өдөр харанхуй байсан юм. Венесуэлийн ерөнхийлөгч Николас Мадуро энэ бүхнийг “америкийн империализм”-ын халдлага гэж нэрлэсэн ч АНУ-ын Төрийн департамент үүнийг няцааж байгаа юм. Сайд Родригесийнхоор бол тус улсын эрчим хүчний гол эх үүсвэрийн нэг Усан цахилгаан станцын хяналтын систем рүү кибер халдлага хийсэнтэй холбоотой гэнэ.
Гуравдугаар сарын 18-нд Миранда муж дахь под станцад дэлбэрэлт болсноос нийслэл Каракас орчимд дахин цахилгаан тасалдахад эмнэлэгт байсан 79 хүн нас барсан гэж мэдээлж байсан юм.