Киргиз, Тажикстаны хоёрын хил дээр даваа гарагт мөргөлдөөн болсноор нэг хүн нас барж, тав зургаан хүн шархадсан байна. Киргизийн хилийн албаны мэдээлснээр бол Ворухын иргэд хилийн маргаантай энэ хэсэгт тосгон руу орох зам дээр үндэснийхээ далбааг мандуулснаас болж маргалдан тажикийн Согд мужийн Ворух Исфаринскийн районы иргэд, киргизийн Баткенск мужийн Аксай тосгоны иргэд мөргөлдсөн байна. Тажикууд Аксай орох зам дээр, хилээс хоёр метрийн зайд өөрийн далбаагаа мандуулсанд дургүйцсэн киргиз иргэд “Аксай” гэсэн самбар байрлуулжээ. Гэтэл тажикууд үүнийг эвдлэн хаясны улмаас киргизийн талаас 40 орчим, тажикийн талаас 50 хүн өөр зуураа мөргөлдсөн байна.
Тажикстаны Ерөнхийлөгч Эмомали Рахмон, Киргизийн Ерөнхийлөгч Сооронбай Жээенбеков нар тажикийн Исфар хотноо уулзаж хилийн маргаантай газруудын тухай хэлэлцэх гэж байгааг тохиолдуулан тэд төрийн далбаагаа ийн мандуулсан нь мөргөлдөөн болж хувирсан байна.

Иргэд эхлээд чулуу, мод шидэлцэж байсан нь сүүлдэ галт зэвсэг хэрэглэхэд хүрч, үүний улмаас Ворух суурингийн дунд сургуулийн багш 52 настай Жалолиддин Кароев суманд оногдож амь эрсэдсэн байна. Өөр бас таван хүн шархадсан гэж зарим хэвлэл мэдээлж байгаа бол Баткенск мужийн эмнэлэгт тосгоны гурван иргэн, хилчин цагдаа гээд найман хүн хэвтэн эмчлүүлж байна гэж мэдээлж байна. Энэ дотор Тажикийн Согд мужийн Дотоодын хамгаалах газрын мөрдөн байцаах хэлтсийн дарга Абдулрасул Шомирсаидов бас байгаа гэнэ. Өөр бас хөнгөн шархтай хүмүүст эмнэлгийн тусламж үзүүлээд гэрт нь явуулсан гэж Ворухын эмнэлгийн ерөнхий эмч Карим Хакимова хэлжээ.
Ворух тосгон нь Киргизийн нутаг дэвсгэрт байдаг бол голын нөгөө талд Ак-Сай тосгон байдаг юм байна. Тажик, Киргиз улс нийт 976 км газраар хиллэдэг ч өнөөдрийн байдлаар зөвхөн 504 км хилээ л баталгаажуулаад байгаа юм. Ак-Сай болон Ворух тосгоны иргэд өнгөрөгч гуравдугаар сарын 13-14-ний өдрүүдэд Ак-Сай-Тамдыкийн зам дээр барилгын ажил хийхийг Ворухын иргэд эсэргүүцсэнээс бас мөргөлдөж харилцан чулуугаар шидэлцэж, сүүлдээ буудалцаж байсан юм.