Украины Ерөнхийлөгч Владимир Зеленский, АНУ-ын тэргүүн Дональд Трамп хоёр өнгөрсөн долоо хоногт утсаар ярилаа хэмээн Украины тэргүүний хэвлэлийн алба мэдээлсэн байна. Америкийн Ерөнхийлөгч Дональд Трамп Украинд парламентын сонгууль амжилттай болж өнгөрсөнд баяр хүргэсэн бол Зеленский хариуд нь Оросын эсрэг хоригийн төлөө талархаж байгаагаа илэрхийлжээ.

Дональд Трамп “Парламентын чөлөөт, ардчилсан сонгуулиа амжилттай явуулсан” гэж Украинд баяр хүргэсэн бол Зеленскийгийн хувьд өөрийнх нь тэргүүлдэг “Ард түмний зарц” нам парламентын сонгуулиар итгэлтэй ялсанд нь мөн баяр хүргэсэн байна.
Украины Засгийн газар шинэчлэгдсэнээр Украин улсын нэр хүнд хурдацтай сайжирч, авлигын хэргийг мөрдөх ажил дуусан, Украин, АНУ-ын хоорондын харилцаа эрчэмжинэ гэдэгт Трамп итгэлтэй байгаагаа илэрхийлсэн гэж хэвлэлийн мэдээнд дурджээ.
Трамп цааш нь “Украины тусгаар тогтнол, газар нутгийн бүрэн бүтэн байдлын төлөө ямагт дэмжлэг үзүүлэх”-ээ батлаад өөрчлөлт шинэчлэлийн хөтөлбөрүүдэд нь бүх талын дэмжлэг үзүүлэхээ амласан гэнэ.

Харин Украины Ерөнхийлөгч Владимир Зеленский Орос хоригоор дарамт үзүүлэх ажилд АНУ тэргүүлж байгаад нь Трампад талархал илэрхийлжээ. Хэвлэлийн албаны мэдээллийн төгсгөлд Зеленский АНУ-д айлчлах төлөвлөгөөтэй байгаа гэсэн ч энэ нь хэзээ болох талаар дурдаагүй байна.
Украины Ерөнхийлөгч Владимир Зеленский энэ сарын 11-нд ОХУ-ын Ерөнхийлөгч Владимир Путинтай анх удаа утсаар ярьж, “Нормандын формат”-ын хүрээнд харилцаагаа үргэлжлүүлэх боломжийн тухай ярилцсан юм.