Украины Ерөнхийлөгч асан Петр Порошенког шүүгчийг дарамтлан хувийн ашиг сонирхолд нь нөлөөлсөн хэмээн эрүүгийн хуулийн 11 дүгээр зүйл ангиар хэрэг үүсгэн шалгаж байна гэж Украины Мөрдөн байцаах хорооны эх сурвалжаас “Страна.ua” мэдээлсэн байна.
Киевийн давж заалдах шатны шүүхийн тэргүүн байсан Антон Чернушенкод дарамт шахалт үзүүлсэн хэмээн Киевийн Печерийн шүүх энэ долдугаар сарын 8-нд эрүүгийн хэрэг нээсэн юм байна. Чернушенкогийн баталж байгаагаар бол Петр Порошенко, түүний тамгын газрын орлогч Алексей Филатов нар түүнийг “Гэм буруугүй хүний хэрэгт шударга бус шийтгэл ногдуулахыг шаардаж байсан” гэнэ.

Ийм анхны тохиолдол 2014 онд болж, Чернушенког Ерөнхийлөгчийн тамгын газарт дуудсан гэнэ. Харин экс Ерөнхийлөгч Порошенко үнэт эдлэлийн Graff дэлгүүрийг тоночхоод байхад Давж заалдах шатны шүүхийн тэргүүн байсан Чернушенко Ерөнхийлөгчийн Гэр бүлийн нэр хүндийг хамгаалж чадаагүй гэж үзэж байгаа юм. Хэвлэлд мэдээлснээр бол тэнд нэгжлэг хийх үеэр Ерөнхийлөгчийн гэргий Марина Порошенкод захиалсан бөгж алга болсон байжээ.
Энэ бүхний төлөө Порошенко долдугаар сарын 25-нд мэдүүлэг өгөхөөр ирсэн ч үүнийг наймдугаар сарын 8 хүртэл хойшлуулжээ.
Украинд Ерөнхийлөгчийн сонгууль болж Владимир Зеленский ялснаас хойш өмнөх тэргүүн Порошенко болон түүний багийнхны эсрэг хэд хэдэн эрүүгийн хэрэг нээгээд байгаа юм. Экс Ерөнхийлөгчийг татвараас зугтаасан, орлогоо нуун дарагдуулсан, “Кузница на Рыбальском” заводыг гэмт хэргийн замаар худалдан авсан зэрэг хэргийн төлөө байцаалтад дуудаж магадгүй болоод байна. Хамгийн эхлээд долдугаар сарын 17-нд дуудсан ч тэр шүүх дээр очоогүй юм.