АНУ-ын Ерөнхийлөгч Дональд Трамп Техас мужид саяхан болсон аймшигт аллагыг гэмт этгээд сэтгэцийн ноцтой эмгэгтэй байснаас болсон гэж тайлбарласныг WHIO хэвлэл дамжуулсан байна. Д.Трамп “ худалдааны төвд гал нээсэн этгээд сэтгэцийн ноцтой өвчинтэй нөхөр байсан” гэжээ. Америкийн тэргүүн ингэж олны эсрэг гал нээдэг явдал манай улсад удаан хугацаагаар үргэлжилж байгаа, үүнийг зайлшгүй таслан зогсоох хэрэгтэй гээд “Манай оронд үзэн ядах орон зай байхгүй” гэсэн байна.
Сүүлийн хэдхэн хоногт АНУ-д галт зэвсэг ашиглан олон хүний амь хөнөөсөн аймшигт гэмт хэрэг хоёр ч удаа гараад байгаа юм. Техаст гэмт этгээд худалдааны төвд гал нээсний улмаас 20 хүн амь үрэгдэж, 26 хүн шархадсан бол өөр нэг этгээд Огайо мужид мөн л галт зэвсэг хэрэглэсний улмаас есөн хүн амь алдаж 27 хүн бэртэж гэмтсэн юм. Галт зэвсэг хэрэглэн олон хүний амь хөнөөдөг ийм гэмт хэргийг АНУ-ын засгийн газар анхааралдаа авна гэж Дональд Трамп мэдэгджээ.