Украины Ерөнхийлөгч Владимир Зеленский “Нормандын формат”-ын яриа хэлэлцээг аль болох хурдан урагшлуулахыг уриаллаа гэж “Интерфакс” хэвлэл мэдээллээ. В.Зеленский энэ уриалгаа ОХУ-ын Ерөнхийлөгч Владимир Путин, Францын Ерөнхийлөгч Эммэнуэль Макрон, Германы канцлер Ангела Меркельд илгээсэн байна. Украины тэргүүн Павлополийн ойролцоо энэ сарын 6-нд болсон буудалцааны үеэр Украины дөрвөн цэргийн албан хаагч амь үрэгдсэнийг онцлон дурджээ. “Талх тарианы эвлэрэл”-ийн гал зогсоох тохиролцоо 17 өдөр үргэлжилсэн. Өнөөдрийн энэ халдлага зөвхөн гал зогсоох тохиролцоог төдийгүй, хэлэлцээрийн явцыг бүхэлд нь тасалдуулахад чиглэж байна” гэж В.Зеленский мэдэгдсэн байна.
Владимир Зеленский өнгөрөгч долдугаар сарын 24-нд ОХУ-ын Ерөнхийлөгч Владимир Путинд дүрс бичлэгээр илгээлт явуулж “Крым хэнийн болон Донбасст хэн байгааг” ярилцахаар уулзъя гэсэн санал тавьсан юм. Гэхдээ тэр энэ уулзалтад АНУ, Францын ерөнхийлөгч нар, Их Британи, Германы Засгийн газрын тэргүүн нарыг байлцуулна гэжээ. Ургац хураах үеэр мөргөлдөөнийг зогсоохоор “Талх тарианы эвлэрэл”-ийг зургадугаар сарын 24-нөөс эхлэн наймдугаар сарын 31 хүртэл Донбасст мөрдөхөөр болсон юм.

“Нормандын формат” гэдэг бол Донбасс дахь нөхцөл байдлыг тогтворжуулахаар байгуулсан Герман, Орос, Франц, Украины төлөөлөгчдөөс бүрдсэн дипломат бүлэг. Энэ дөрвөн орны тэргүүн нар Донбассын хууль ёсны статусыг бэхжүүлэх, гал зогсоох асуудлыг багтаасан баримт бичигт 2015 оны хоёрдугаар сард Белоруссын нийслэл Минскт гарын үсэг зурсан юм.
Украины Донецк, Луганск мужууд Киевийн шинэ Засгийн газрыг хүлээн зөвшөөрөлгүй тусдаа Бүгд найрамдах улс болон салан тусгаарлана гэснээс үүдэн 2014 оны хавраас энд зэвсэгт мөргөлдөөн гарч эхэлсэн юм.