Тактикийн удирдлагат пуужин харваснаа АНУ болон Өмнөд Солонгост хамтарсан цэргийн сургууль хийх гэж байгаад нь өгч байгаа сануулга гэж БНАСАУ-ын удирдагч Ким Чен Ун мэдэгдсэнийг Солонгосын мэдээллийн төв агентлаг дамжуулсан байна.
Умард Солонгосын удирдагч пуужин туршсан явдалд талархаад, сэтгэл хангалуун байгаагаа илэрхийлжээ. Тэрээр “Энэ бол цэргийн хамтарсан сургууль хийх гэснийх нь төлөө АНУ болон Өмнөд Солонгост илгээх сануулга” гэж мэдэгдсэн байна.

Умардын хоёр пуужин Пеньяны дээгүүр нисээд нутгийн зүүн эрэг дэх байг оносон гэж мэдээллийн агентлагийн мэдээнд дурджээ.
Вашингтон, Сөүлийн цэргийн хамтарсан сургууль нь АНУ, Өмнөд Солонгостой харилцах харилцаанд дэвшил гаргах замыг хааж, өөр арга зам хайхад хүргэж байна гэж Умард Солонгосын Гадаад хэргийн яам үүний өмнө мэдэгдсэн юм. Гадаад хэргийн яамны мэдэгдэлд, хэрэв БНАСАУ-ын сануулгыг үл тоомсорлох юм бол “Өндөр үнээр л төлөх болно” гэжээ.
Умард Солонгосын наймдугаар сарын 6-нд харвасан пуужин хоёр долоо хоногийн дотор харвасан дөрөв дэх туршилт юм. БНАСАУ анхааруулсаар байгаа ч гэсэн Сөүл, Вашингтон хоёр төлөвлөсөн ёсоороо цэргийн хамтарсан сургууль хийнэ гэж Өмнөд Солонгосын Батлан хамгаалах яам наймдугаар сарын 5-нд мэдэгдээд байгаа юм.