Хятад, Америкийн худалдааны дайн хурцадсантай холбоотойгоор биржийн уналтаас болж манай гаргийн хамгийн баян хүмүүс өнгөрсөн даваа гарагт нийт хөрөнгийнхөө 2.1 хувь болох 117 тэрбум ам.доллар алдлаа гэж Bloomberg Billionaires Index-ийн мэдээллээс эш татан Блумберг агентлаг мэдээллээ.
Хятадын нийт 300 тэрбум ам.долларын бараа бүтээгдэхүүнд нэмэлт 10 хувийн татвар ногдуулах тухайгаа АНУ-ын Ерөнхийлөгч Дональд Трамп өнгөрсөн долоо хоногт мэдэгдсэн. Хятад үүнийх нь хариуд юанийхаа ам.доллартой харьцах ханшийг өнгөрөгч арванхоёрдугаар сараас хойш хамгийн бага болгосон юм. Үүнийг Д.Трамп шүүмжлэн хоёр орны хоорондох худалдааны сөргөлдөөнт байдлыг улам хурцатгасан явдал гэж Twitter-тээ бичсэн.

Энэ бүхнээс болоод Bloomberg Billionaires Index индекст ордог дэлхийн 500 хүний 21 нь нэг их тэрбум түүнээс их хөрөнгөө алдсан байна. Хамгийн их буюу 3.43 тэрбум ам.долларын хөрөнгөө Amazon-ыг үндэслэгч, тэргүүн Жефф Безос алджээ. Гэхдээ л тэр 110 тэрбум ам.доллартойгоороо дэлхийн хамгийн баян хүн хэвээр байна.
Louis Vuitton Moet Hennessy группийн ерөнхийлөгч Бернер Арно мөн нэг өдөрт гурван тэрбум ам.доллароо алджээ. Тэр 3,25 тэрбум ам.долларын алдагдал хүлээсэн ч 97.6 тэрбум доллартой үлдэж хамгийн баян хүмүүсийн жагсаалтын гуравдугаарт үлдэж байна. Facebook-ийг үндэслэгч Марк Цукерберг, энэтхэгийн тэрбумтан Амбани Мукеш, Microsoft-ыг үндэслэгч Билл Гейтс нар тус бүр хоёр тэрбум ам.доллар алджээ.
Манай гаргийн хамгийн баян 500 хүн нийт 5.4 их наяд доллар эзэмшиж байгаа нь энэ оны нэгдүгээр сарын 1-нийхээс 11 хувь их байгаа юм.