Москвад саяхан болсон нийслэлийн Думын сонгуультай холбоотой эсэргүүцлийн жагсаал цуглаанд “АНУ хөндлөнгөөс оролцсон гэсэн шинж тэмдгүүд байна” гэж ОХУ-ын Холбооны зөвлөлийн тусгаар тогтнолыг хамгаалах комиссын тэргүүн Андрей Климов мэдэгдсэн байна. “Москвагийн думын ээлжит сонгуульд АНУ болон тэдний холбоотнууд нөлөөлөх, өдөөн хатгахаар оролдсон гэдгийг бид өмнө нь ярьж байсан. Харамсалтай нь бидний энэ яриа, таамаг үнэн болох нь батлагдлаа” гэж ноён Климов ажлын хэсгийнхээ хуралдаан дээр мэдэгдсэнийг РИА Новости агентлаг дамжуулжээ.

Москвагийн Думын сонгуульд бие даан нэр дэвшихээр саналаа ирүүлсэн 57 хүнийг сонгуулийн хороо бүртгэхээс татгалзсанаас үүдэн Москва хотын төвд эсэргүүцлийн жагсаал цуглаан болж эхэлсэн юм. Энэ сөрөг хүчний нэр дэвшигчид гарын үсэг цуглуулан сонгуулийн хороонд хандсан боловч мөн л бүртгээгүй юм.
Энэ бүхнийг эрх баригчид хууль бус жагсаал цуглаан хэмээн хүчнийхнийг дайчлан тараасан. Долдугаар сарын 27-нд болсон цуглаанд 6000 орчим хүн оролцсоны 1.3 мянгыг нь саатуулан баривчилсан гэж “ОВД-Инфо” мэдээлж байлаа. Улмаар Оросын Мөрдөн байцаах хороо эрүүгийн хуулийн дагуу хэрэг үүсгэн шалгаж байгаа юм.
Наймдугаар сарын 3-нд Москвагийн төвд бас дахин цуглаан болсноос эрх баригчид 1001 хүнийг баривчлаад байна.