Москвад болсон жагсаал цуглааны талаар дипломат сайтдаа мэдээлсэн улс орнуудын Элчин сайдуудыг ОХУ-ын Холбооны зөвлөлийн тусгаар тогтнолоо хамгаалах комисс хуралдаандаа дуудаж ирүүлэхээр төлөвлөж байна гэж тус комиссын гишүүн Людмила Бокова өнгөрсөн ням гарагт мэдээллээ.
Түүний хэлснээр бол Москвад болсон жагсаал цуглаан хаана эхэлж, хаагуур явахыг хэд хэдэн ЭСЯ-ны сайтад дэлгэрэнгүй мэдээлсэн гэнэ. “Ингэж мэдээлэх нь өөрийн иргэддээ сэрэмжлүүлж байгаа юм уу, эсвэл жагсаал цуглаан, эмх замбараагүй байдалд хүмүүсийг уриалж байгаа юм уу, гэдэг нь ойлгомжгүй байна” гэж Бокова РИА Новостигийн сурвалжлагчид хэлжээ.

Бокова бас үүнийг Оросын дотоод хэрэгт, ялангуяа сонгуулийн үйл явцад хөндлөнгөөс оролцож байгаа хэрэг гэж үзэж болно гэжээ. Энэ бүхнээс үүдээд хэд хэдэн орны ялангуяа АНУ-ын Элчин сайдын яамны төлөөлөгчийг есдүгээр сард болох хуралдаандаа ирүүлэх хэрэгтэй байгаа юм гэжээ.
Холбооны зөвлөлийн Олон улсын асуудлаарх хорооны орлогч дарга Андрей Климов гадаадын хүчнүүд YouTube-ийн шууд бичлэг ашиглан оросын иргэдийг жагсаал цуглаан зохион байгуулж, хууль зөрчихөд өдөөн хатгаж байна гэж наймдугаар сарын 11-нд мэдэгдсэн юм.

Москвагийн Думын сонгуульд бүртгэхээс татгалзсан бие даагчдыг дэмжих албан ёсны зөвшөөрөлтэй жагсаал наймдугаар сарын 10-нд болж 20 орчим мянган хүн оролцсон юм. Энэ үеэр нийгмийн хэв журам зөрчсөн ямар нэг үйлдэл гараагүй ч энэ цуглаан тарсны дараа дахиад Сахаровын өргөн чөлөөнд зөвшөөрөлгүй цуглаан болсон байна. Цагдаагийнхан жагсагчдыг тарахыг шаардан энэ үеэр 136 хүнийг баривчлан саатуулсан байна.

Москва хотын Думын сонгуульд бие даагчид, сөрөг хүчнийхнийг бүртгэхээс сонгуулийн комисс татгалзсаны улмаас нийслэл Москвад өнгөрөгч долдугаар сарын 27-ноос эхлэн эсэргүүцлийн жагсаал болж байгаа юм. Сүүлийн хоёр жагсаалын үеэр хууль сахиулагчид нийт 1915 хүнийг саатуулан захиргааны хууль зөрчсөн хэмээн хэрэг үүсгэн шүүхэд шилжүүлээд байгаа юм байна. Өөр бас 880 хүнийг торгож шийтгэсэн байна.