ОХУ-ын Владимир мужийн Кольчугино хотод зэвсэглэсэн дайчид байж болзошгүй хүмүүс байшин эзэлсний улмаас терроризмын онц дэглэм тогтоож хүчний байгууллагынхан байшинг бүслэн дайрахаар бэлтгэж байна гэж Терроризмын эсрэг үндэсний хороо мэдээлснийг РИА Новости агентлаг дамжуулжээ. “Владимир мужид терроризмын эсрэг ажиллагаа явуулж байна. Кольчугино хотын нутаг дэвсгэрт” гэж албаны мэдээлэлд дурджээ. Үйл явдал, ажиллагааны талаар тодорхой мэдээлээгүй байна. Гэмт этгээдүүдийг зэвсэглэсэн байсан гэж эх сурвалж хэлснийг ТАСС агентлаг мэдээлжээ.

“Бууж өгөхийг санал болгоход гэмт этгээдүүд хариу гал нээсэн, одоо тэднийг аюулгүй болгох арга хэмжээ авч байна” гэж хүчний байгууллага дахь эх сурвалж агентлагийн сурвалжлагчид хэлсэн байна.
Сүүлд ирсэн мэдээгээр хэсэг буудалцсаны дараагаар хүчнийхэн байшинг эзэлж гэмт этгээдүүдийг аюулгүй болгожээ. Байшингаас зэвсэг, галт хэрэгсэл, гар хийцийн бөмбөг хийхээр бэлтгэсэн материал, шашин, хэт даврах үзэл сурталчилсан номууд хураасан гэж zebra-tv.ru хэвлэл мэдээлжээ. Хэвлэлд бичсэнээр бол хүчний байгууллагынхан, энгийн ард иргэдээс гэмтэж шархдаагүй гэнэ.

Дөрөвдүгээр сарын 12-ны өдөр Тюменьд бас терроризмын эсрэг ажиллагаа болж “Исламын улс” бүлэглэлийн зэвсэгт дайчид байж болох хүмүүс хувийн байшинд орогнож байсныг аюулгүй болгох үеэр калашниковын хоёр автомат, гар хийцийн дэлбэлэх бодис, тэсрэх бодисын материал, шашны ном зохиолууд хураан авсан юм.