Венесуэлийн Үндэсний зохион байгуулах хурал парламентын сонгууль зарлаж, хугацааг товлох комисс байгууллаа хэмээн тус хурлын спикер Диосдад Кабельогийн эх сурвалжаас аван NTN 24 телевиз мэдээлсэн байна.

Энэ комисс Үндсэн хууль, улс орон дахь улс төрийн нөхцөл байдлыг харгалзан парламентын сонгуулийн хугацааг товлох юм. Үүнтэй холбогдуулан парламентын сонгууль энэ жил болж магадгүйг Кабельо үгүйсгэсэнгүй. Венесуэлийн ерөнхийлөгч Николас Мадуро ч парламентын сонгууль тун удахгүй болж мэднэ, засгийн газар үүнд бэлэн байна гэж өнгөрөгч долдугаар сард мэдэгдэж байсан юм.

Тус улсын парламентын өнгөрсөн сонгуулиар олонх болж хууль тогтоох байгууллагыг хянаж байгаа сөрөг хүчинд парламентын ээлжит бус сонгууль явуулъя хэмээн Николас Мадуро бүр тавдугаар сард санал тавьж байсан юм. Түүнийхээр бол Үндэсний ассамблейг хууль ёсны дагуу ажиллуулахын тулд сөрөг хүчин, засгийн газар хоёр хүчээ нэгтгэх ёстой гэнэ. Өнөөдөр Үндэсний Ассамблей улс орны улс төрийн амьдралд бараг үүрэг гүйцэтгэхээ больж хууль тогтоох эрх мэдэл Николас Мадурогийн өөртөө тааруулан байгуулсан Үндэсний зохион байгуулах хурлын мэдэлд ороод байгаа юм.

Венесуэлийн сөрөг хүчин олонх болсон Үндэсний ассамблейн спикер Хуан Гуайдо өнгөрөгч нэгдүгээр сарын 21-нд өөрийгөө тус улсын түр цагийн ерөнхийлөгч хэмээн зарласнаар венесуэльд улс төрийн нөхцөл байдал хурцдаад орон даяар эсэргүүцлийн хөдөлгөөн өрнөсөн. АНУ тэргүүтэй барууны орнууд Хуан Гуайдог хүлээн зөвшөөрч байгаа бол ОХУ, Хятад, Турк, Куба зэрэг орнууд Николас Мадурог хууль ёсны ерөнхийлөгч хэмээн дэмжиж байгаа юм.