Өнөөгийн нөхцөл байдал сайжрахгүй юм бол АНУ, Дэлхийн худалдааны байгууллагаас гарна гэж Ерөнхийлөгч Донгальд Трамп мэдэгдсэн байна. “Бидэнд хэрэгтэй гэж үзэх л юм бол бид энэ байгууллагыг орхино” гэж Д.Трамп Пенсильван мужид нефть химийн Shell корпорацын ажиллагсадтай уулзах үеэрээ хэлжээ. “Тэд жилээс жилд биднийг ашигласаар байгаа, цаашид үүнийг давтах ёсгүй” гэж АНУ-ын Ерөнхийлөгч мэдэгдсэн байна.

Дэлхийн худалдааны байгууллагаас гарна гэсэн энэ мэдэгдэл АНУ-ын Ерөнхийлөгчийн хувьд анхных биш. Жилийн өмнө тэр бас хэрвээ энэ байгууллага “АНУ-тай сайнаар харилцаж эхлэхгүй юм бол” Дэлхийн худалдааны байгууллагаас АНУ гарна гэж мэдэгдэж байсан юм.
Японы Осакад болсон дээд хэмжээний уулзалтын үеэр Их-20-ийн тэргүүнүүд Дэлхийн худалдааны байгууллагад шинэчлэл хийх цаг болсон гэж байсан юм. Тэд чөлөөт, шударга худалдааны зэрэгцээ, хөрөнгө оруулалтын сайн нөхцөл бүрдүүлэхийн төлөө байгаагаа илэрхийлж байсан. Гэхдээ тодорхой алхам хийгээгүй өнгөрсөн юм.