АНУ-ын Ерөнхийлөгч Дональд Трамп үндэсний аюулгүй байдал хариуцсан албан тушаалтнууддаа Венесуэль рүү далайгаар орж байгаа бараа бүтээгдэхүүнийг бүслэн хаах санал тавьжээ хэмээн энэ тухай сонссон гэх хуучин алба хааж байсан таван ч албан тушаалтны эх сурвалжаас авснаа Axios хэвлэлд нийтэлсэн байна.
Хэвлэлд бичсэнээс үзвэл АНУ-ын тэргүүн Боливарын бүгд найрамдах улсын эрэгт ойртож байгаа хөлгүүдийг зогсоох санал дэвшүүлжээ. Д.Трамп ийм саналаа бүр жил хагасын өмнө хэлж байсан, хэдэн долоо хоногийн өмнө дахин илэрхийлсэн гэнэ. Д.Трампын ийм санал тавихыг сонсч байсан албан тушаалтнуудын нэг “Тэр хөлгүүдээ гаргаж далайн зүгээс бүслэн хаах ёстой гэж хэлсэн” гээд үүний тулд асар их, магадгүй америкийн флотоос ч их нөөц хүч хэрэгтэй гэсэн байна. Трамп үүний өмнө ч Венесуэлийг далайн зүгээс бүслэн хаах тухай ярьж байсан ч хэрхэн яаж хэрэгжүүлэхээ яриагүй юм.
АНУ-ын нутаг дэвсгэрт байгаа Венесуэлийн активыг блоклох тухай зарлигт АНУ-ын ерөнхийлөгч Дональд Трамп энэ наймдугаар сарын эхээр гарын үсэг зурсан юм.