Украинд айлчилж байгаа Израилын ерөнхий сайд Биньямин Нетаньяхугийн гэргий Сара Киевт тэднийг нисэх буудал дээр угтан авах үеэр украинчуудын хүндэт зочиндоо барьж угтдаг талх давсыг амсахаас татгалзаж талхны хэсгийг аван газар хаясан дүрс бичлэгийг News Front телевиз дамжуулсан байна.
Дүрс бичлэг дээр хүндэт зочдыг нисэх буудал дээр үндэсний хувцас өмссөн гурван украин бүсгүй уламжлалт талх давсаа барин угтаж байгаа нь харагдаж байна. Биньямин Нетаньяху эхлээд талхнаас эмтлэн давсанд дүрж идээд нэг хэсгийг гэргийдээ өгсөн байна. Гэтэл Сара түүнийг нь амсах ч үгүйгээр газар хаяж орхижээ. Израилын ерөнхий сайдын гэргийн дуулиан үүгээр зогссонгүй. Хатагтай өөртэйгөө мэндэлсэнгүй хэмээн онгоцны даргыг зэмлээд, түүнд таагүй байгаагаа илэрхийлэхийн тулд онгоцны бүхээг рүү орох гэж зүтгэсэн гэж израилын Вести сайтад бичсэн байна.

Хатагтай Сараг үүний өмнө зоогийн газарт захиалж идсэн хоолны төлбөрөө улсын төсвөөс төлснийх нь төлөө Иерусалимын шүүх торгож шийтгэж байсан юм.
Израилын Ерөнхий сайд Биньямин Нетаньяху Украины Ерөнхийлөгч Владимир Зеленскинй урилгаар наймдугаар сарын 18-наас Киевт айлчилж байгаа юм.