Европын сансрын агентлаг АНУ-ын талаас үзүүлж байгаа дарамт шахалтаас болоод оросын “Союз” пуужин ашиглахаас татгалзаж байна гэж оросын сансрын нисэгч Павел Виноградов “360” телевизээр ярихдаа мэдэгджээ.
“Биднийг францууд, немцүүдтэй маш сайн харилцаатай байдгаас болоод ямагт бухимдаж, энэ харилцаа, хамтын ажиллагааг тасалдуулахын тулд дээд хэмжээгээр ажиллаж байгаа юм” гэж Виноградов тэмдэглэсэн байна.

Түүнийхээр бол Европын сансрын агентлагийн энэ шийдвэрээс болоод оросын сансар судлал юугаар ч хохирохгүй, “Союз” хөлгийн нислэг ч цөөрөхгүй гэнэ. “Европын сансрын агентлаг, Европоос гадна сансарт хүнээ нисгэх сонирхолтой өөр олон орон байгаа” гээд ирэх есдүгээр сард Арабын нэгдсэн эмиратын нисэгч Союз хөлгөөр ниснэ гэжээ.
Европын сансрын агентлагийн Орос дахь төлөөлөгч Рене Пишель өнгөрөгч долдугаар сард сансрын нисгэгч Лука Пармиано Олон улсын сансрын станц руу оросын Союз хөлгөөр нисэх манай хамгийн сүүлчийн нисгэгч болно гэж мэдэгдсэн юм. Үүнээс хойш оросын хөлгийг америкийн сансран хөлгүүд орлох юм байна.