Германы канцлер Ангела Меркель, Украины Ерөнхийлөгч Владимир Зеленский хоёр наймдугаар сарын 28-ны лхагва гарагт утсаар ярих үеэрээ “Нормандын формат” дээд хэмжээний уулзалтыг ойрын үед хийх хэрэгтэй гэдэг дээр санал нэгдлээ гэж ХБНГУ-ын Засгийн газрын албан ёсны төлөөлөгч Штеффен Зайберт мэдэгдсэнийг “Интерфакс” агентлаг мэдээлжээ.
“Минскийн хэлэлцээр бүрэн бодитой хэрэгжих ёстой гэж канцлер, украины ерөнхийлөгч хоёр үзэж байна. Тэд “Нормандын формат” дээд хэмжээний уулзалтыг ойрын үед хийх ёстой гэж үзлээ” хэмээн Зейбертийн мэдэгдэлд тэмдэглэсэн байна.

“Нормандын формат”-ын дээд хэмжээний уулзалтад ерөнхийлөгч Владимир Путин нэг тал болж оролцоно, гэхдээ энэ уулзалтад бэлтгэхийн тулд хэн нэг нь “гэрийн ажил” хийх ёстой гэж ОХУ-ын ерөнхийлөгчийн хэвлэлийн нарийн бичгийн дарга Дмитрий Песков наймдугаар сарын 29-нд мэдэгдээд байгаа.
Францын ерөнхийлөгч эммануэль Макрон бас “Нормандын формат” дээд хэмжээний уулзалтыг есдүгээр сард хийх нь зүйтэй гэсэн төлөвлөгөөгөө наймдугаар сарын 26-нд мэдэгдсэн. Түүнийхээр бол энэ төлөвлөгөөгөө ОХУ-ын Ерөнхийлөгч Владимир Путин, Украины Ерөнхийлөгч Владимир Зеленскийтэй ярилцсан гэнэ.

“Нормандын формат”-ыг өргөжүүлэх нь зүйтэй гэсэн саналаа Украины ерөнхийлөгч Владимир Зеленский өнгөрсөн долдугаар сард Владимир Путинд санал болгож байсан юм.
Зеленский бас уулзалтыг Минскт хийж, “Крым хэнийх вэ”, “Донбасст хэн байхгүй байна” гэдгийг АНУ, Их Британи, Франц, Германыг оролцуулан хэлэлцье хэмээн уриалжээ.
“Нормандын дөрвөл” Орос, Франц, Герман, Украины тэргүүнүүд 2015 онд Белоруссын нийслэл Минскт уулзаж Украины дорнод нутагт болж байгаа сөргөлдөөнийг намжаахад чиглэсэн иж бүрэн арга хэмжээг боловсруулсан юм. Үүнээс хойш “Нормандын формат”-ын уулзалтууд Гадаад хэргийн сайд нар, шинжээчдийн түвшинд болж байлаа.
Украины зүүн өмнөд нутагт зэвсэгт мөргөлдөөн 2014 оны хавраас хойш үргэлжилсээр байгаа юм. Тус нутгийн иргэд украины шинэ газарт захирагдахаас татгалзаж, Донецк, Луганск мужууд өөрийгөө тусгаар тогтносон бүгд найрамдах улс хэмээн тунхагласан юм. Энэ бүхний хариуд Киев терроризмын эсрэг ажиллагаа нэртэйгээр цэрэг оруулснаар зэвсэгт мөргөлдөөн эхэлсэн юм.