Колумбын нийслэл Боготад суугаа Элчин сайдын яамандаа Венесуэлийн асуудал хариуцсан хэлтэс нээлээ. Энэ нь Боливарын бүгд найрамдах улсын хэргийг түр хамаарах дипломат албан байр болох юм гэж АНУ-ын Төрийн департамент албан ёсны сайтдаа мэдээлжээ.
“Венесуэлийн хэлтэс нь энэ оронд үндсэн хуулийн дэг журам, ардчиллыг сэргээх, мөн аюулгүй байдлыг хангах, венесуэлийн ард түмний сайн сайхны төлөө ажиллана” гэж мэдэгдэлд дурдсан байна.

Венесуэлийн сөрөг хүчний удирдагч, өөрийгөө тус улсын ерөнхийлөгч хэмээн өргөмжлөөд байгаа, парламентын спикер Хуан Гуайдотой байнгын харилцаа холбоотой ажиллах энэ хэлтсийг АНУ-ын конгрессын дэмжлэгээр байгуулсан гэж Төрийн департамент тэмдэглэжээ.
АНУ-ын Төрийн нарийн бичгийн дарга Майк Помпеогийн мэдэгдлээс эш татаж нутгийн Infobae сайт мэдээлснийг үзвэл энэ хэлтсийг АНУ-д Венесуэлийн асуудал хариуцсан Жеймс Стори хариуцах юм байна.

Өнөөгийн ерөнхийлөгч Николас Мадурог тангараг өргөсний дараа түүнийг хүлээн зөвшөөрөхгүй хэмээн сөрөг хүчин олонх парламентын спикер Хуан Гуайдо өөрийгөө түр цагийн ерөнхийлөгч хэмээн өргөмжлөн ерөнхийлөгчийн ээлжит бус сонгууль явуулна гэснээр тус улсын дотоод хямрал эхэлж нөхцөл байдал хүндэрсэн юм. Харин Николас Мадуро болохоор Гуайдог Үндсэн хуулийн бус ерөнхийлөгч хэмээн мэдэгдсэн.

АНУ тэргүүтэй барууны орнууд, Латин Америкийн ихэнх оронд Гуайдог Венесуэлийн Ерөнхийлөгч хэмээн хүлээн зөвшөөрч байгаа бол Орос, Турк, Хятад, Куба, Болив зэрэг орнууд Николас Мадурог хууль ёсны ерөнхийлөгч хэмээн дэмжиж байгаа юм.
Мадуро АНУ-аас дипломат харилцаагаа тасалж америкийн дипломатуудыг эх орноосоо гарч явахад нь 72 цагийн хугацаа өгч байсан юм.
Венесуэльд АНУ-ын ашиг сонирхлыг Швейцарь төлөөлнө гэж Вашингтон, Берн хоёр тохиролцлоо хэмээн АНУ-ын Төрийн департаментын хэвлэлийн алба өнгөрөгч дөрөвдүгээр сард мэдээлсэн ч Венесуэлийн эрх баригчид Швейцарийг АНУ-ын төлөөлөл гэж үзэхгүй хэмээн татгалзсан юм.