Дэлхий дэлгэнэсэн дэлгэр зуны улирал дэндүү сайхан. Зөөлөн шиврэх бороон дуслууд хацар гижигдэн урсахад зөндөө олон дурсамж сэтгэлд хургах нь сайхан. Үргэлжлэн орох борооноор уулсын оройд цэнхэр манан суух нь сайхан. Дэндүү олон сайхны цаана нутгаа санах сэтгэл бүр сайхан. Энэ жилийн наадам талбайдаа үзэгчгүй, бас хуушуургүй болно гэсэн нь жаахан уйтай. Гэвч “Наадмаар яах гэж байна. Хаашаа аялах вэ” гэж бие биенээсээ асуух хүн олонтаа. Мөн нутагтаа очно. Сумын наадмаа үзээгүй удсан гэж буй нь ч байна. Зарим нь байгалийн сайханд аялахаар бэлтгэлээ базааж байгаа гэнэ. Томоохон зах худалдааны төвүүдээр майхан, хөнжил гудас гээд аяны хэрэгсэл цуглуулах, газрын зураг, үзэсгэлэнт байгалийн мэдээлэл зэргийг сонирхож байгаа хүн олон байна. Хамгийн гол нь алсын замд хурд хэтрүүлэн давхихгүй “Хурдан яваад ирэв үү биш. Сайн яваад ирэв үү” гэдэг монгол үг, уламжлалаа дагаарай. Бас очсон газар бүртээ хур хог үүсгэж орхилгүй яваарай. Хурд хэтрүүлсэн хөдөлгөөн, хог хаясан үйлдэл хоёр Монгол хүнд зохихгүй. Түүнээс бусдаар зуны амралт зугаатай сайхан.