ОХУ-ын Екатеринбург хотноо сонирхогчдын боксын 20 дахь удаагийн дэлхийн аварга шалгаруулах тэмцээн үргэлжилж байна. Тэмцээний тав дахь өдөр буюу энэ сарын 14-нд манай улсын шигшээ багийн тамирчин Б.Чинзориг, Х.Энхмандах нар рингэнд гарсан. 52 кг-ын жинд хөх булангаас гарч тулалдсан Х.Энхмандах Казахстаны С.Бибоссиновтой тоглон таван шүүгчийн саналаар 2:3-ын харьцаатай хожигдсон байна. Тэгвэл 63 кг-ын жинд өрсөлдсөн Б.Чинзориг өрсөлдөгч БНХАУ-ын Шан Жунтай тоглож илт давуу онооны харьцаа буюу 5:0 харьцаатай хожиж шөвгийн 16-д шалгараад байна. Ялалт байгуулсан Б.Чинзоригийн дараагийн өрсөлдөгч нь Энэтхэгийн М.Куашик байх юм. Шөвгийн наймын төлөөх тулаан мягмар гарагт болно.

Өчигдөр орой манай ширэн бээлийнтүүндээс Азийн наадмын аварга Э.Цэндбаатар эхний тулаанаа хийлээ. Түүний өрсөлдөгч нь Киргизстаны Мунарбек Сейтбек Улу байв. Манай боксчдоос одоогийн байдлаар Б.Чинзориг, Э.Цэндбаатар, Г.Баярхүү нар тэмцээнээ үргэлжлүүлж байна. 75 кг-ийн жингийн Д.Давааням Узбекистаны Ф.Кахрамоновт, 81 кг-д Н.Шинэбаяр эхний учраа Узбекистаны Д.Рузметовт, 91 кг-ийн жинд С.Эрдэнэбаяр Словакын Д.Михалект тус тус хожигдож тэмцээнээ өндөрлүүлээд буй.