Чөлөөт бөхийн 2019 оны дэлхийн аварга шалгаруулах тэмцээн энэ сарын 14-нд Казахстан улсын нийслэл Нур-Султан хотын “Барыс Арена” ордонд сонгомол бөхийн төрлөөр эхэлсэн. ДАШТ-д жин тус бүрийн эхний зургаан байранд шалгарсан бөхчүүд “Токио-2020” олимпын наадамд оролцох эрхээ авна.
Чөлөөт бөхийн барилдаан өчигдөр эмэгтэйчүүдийн 50, 53, 55 болон 72 кг-ын жингийн барилдаанаар эхэллээ. Манай улсаас өчигдөр 2011 оны дэлхийн аваргын мөнгөн медальт Б.Оюунсүрэн, 2013 оны дэлхийн аваргын мөнгөн медальт Э.Сумъяа, залуучуудын ДАШТ-ий хүрэл медальт Ц.Намуунцэцэг болон И.Ярыгины нэрэмжит “Алтан Гранпри” тэмцээний хүрэл медальт Б.Болортуяа нар дэвжээнд гарч зодоглосон.

50 кг-д зодоглосон Ц.Намуунцэцэг эхний тойрогт ОХУ-ын бөх Екатерина Полещукт 7:9-ийн харьцаагаар ялагдчихлаа. Эхний минутад дөрвөн оноо алдсан манай бөх нэмж хоёр оноо алдаад 6:0 болсон. Нэгдүгээр үеийн төгсгөлд санаачилгыг гартаа авч, хөлд орж, оноо авсаар 6:6-гаар оноог тэнцүүлээд эхний үе дууссан. Гэвч хоёрдугаар үеийн эхэнд өрсөлдөгчдөө хөлөө алдан хоёр оноо бэлэглэж нийт 9:7-гоор ялагдлаа.

Харамсалтай нь манай бөхийг ялсан ОХУ-ын Екатерина Полещук шөвгийн наймд Азербайжаны дэлхийн аварга Мария Стадникт ялагдсан тул Ц.Намуунцэцэгт дагах боломж гарсангүй. Шөвгийн дөрөвт ДАШТ-ий алт, мөнгөн медальт БНХАУ-ын Сун Янан, ДАШТ-ий алт, гурван мөнгө, нэг хүрэл медальт Азербайжаны Мария Стадник, Румыны Эмилия Алина, Казахстаны Валентина Исламова нар шалгарлаа. 
53 кг-д олон улсын хэмжээний мастер, 2013 оны дэлхийн аваргын мөнгөн медальт Эрдэнэчимэгийн Сумъяа зодоглосон. Э.Сумъяа ДАШТ-д бөөн шуугиан болж явж байсныг уншигчид санаж байгаа биз. Түүний жинд УАШТ-д түрүүлсэн залуу бөхийг явуулсангүй гээд аав нь эсэргүүцсэн.  Э.Сумъяа эхний өрсөлдөгч Камеруны бөх Тиако Эссомбег 14:2-оор ялсан. Харин дараагийн тойрогт ДАШТ-ий хошой хүрэл (2012, 2017), Европын АШТ-ий мөнгө, хошой хүрэл медальт, Грекийн бөх Мария Преволаракид 5:2-ын харьцаатайгаар ялагдлаа. Ямар ч байсан Грекийн бөх хагас шигшээд шалгарсан. Тэрбээр хагас шигшээд Японы Маюу Мукайдаг ялж чадвал манай бөхөд дагах барилдаан хийх боломж гарч ирнэ. 53 кг-ын жинд хагас шигшээд дээрх хоёр бөхөөс гадна БНХАУ, БНАСАУ-ын тамирчид үлдэв.
55 кг-д манай бөх Б.Болортуяа эхний өрсөлдөгч Энэтхэгийн Лалитаг 10:3-ын харьцаатай хожсон. Гэвч дараагийн тойрог  болох шөвгийн наймд Пан Америкийн АШТ-ий хүрэл медальт АНУ-ын бөх Ж.Винчестерт 13:2-оор ялагдлаа. Хэрэв америк бөх хагас шигшээд Туркийн Бедих Гунийг ялж чадвал манай  Б.Болортуяа дагах барилдаан хийнэ. 23 хүртэлх насны Азийн АШТ, Иван Ярыгиний нэрэмжит “Алтан гран при”-гийн хүрэл медальт, ДАШТ-д анх удаа зодоглож буй ОУХМ Б.Болортуяа “Женко” клубийн тамирчин.

72 кг-д 2011 оны дэлхийн аваргын мөнгөн медальт Б.Оюунсүрэн зодоглолоо. Бэртэл, гэмтлээс болж хэсэг хугацаанд спортоо орхиод байсан Б.Оюунсүрэн энэ жилийн улсын аваргад түрүүлж Нур-Султаныг зорьсон. Б.Оюунсүрэн эхний тойрогт Хятадын Палиха Палихатай таарч барилдан 1:4-өөр ялагджээ. Палиха Палиха хагас шигшээд шалгарсан.
Өнөөдөр эмэгтэйчүүдийн 50, 53, 55, 72 кг-ын медальтнууд тодорно. Мөн эмэгтэйчүүдийн 57, 59, 65, 76 кг-ын бөхчүүд дэвжээнд гарч урьдчилсан барилдаанаа хийнэ.