-Боксчин Э.Цэндбаатар өнөөдөр мөнгөн медалийн төлөө тоглоно-

Бокс болон чөлөөт бөхийн дэлхийн аварга шалгаруулах тэмцээн үргэлжилж байна. Казахстаны нийслэл Нур-Султан хотод болж байгаа чөлөөт бөхийн ДАШТ-ээс манайхан эхний медалиа авч эхэллээ. Уржигдар орой үндэсний шигшээ баг, “Женко” клубын тамирчин, олон улсын хэмжээний мастер Бат-Очирын Болортуяа дэлхийн дэвжээнд анх удаа зодоглож, хүрэл медалиар энгэрээ мялааж монголчуудын медалийн салхийг хагаллаа.

Эмэгтэйчүүдийн 55 кг-ын жинд хүч сорьж буй тэрбээр хүрэл медалийн төлөөх барилдаанд Туркийн бөх Бедиха Гунтэй барилдаж, 12:9-өөр ялснаар дэлхийн дэвжээнээс Монголын чөлөөт бөхийн тамирчдаас 33 дахь хүрэл медалийг эх орондоо авчирлаа. Мөн өчигдөр орой эмэгтэйчүүдийн 59 кг-д Б.Шоовдор хүрэл медаль хүртлээ
Тэгвэл уржигдар дахин нэг сайхан мэдээг боксчид хүргэв. ОХУ-ын Екатеринбург хотноо болж буй сонирхогчдын боксын дэлхийн аваргын тэмцээнээс Азийн наадмын алтан медальт, Ази тивийн аварга, олон улсын хэмжээний мастер Эрдэнэбатын Цэндбаатар хагас шигшээд шалгарч, медалийн болзол хангалаа. 57 кг-ын жинд өрсөлдөж буй Э.Цэндбаатар хагас шигшээд шалгарах эрхийн төлөө Ирландын боксчин К.Волкертэй тоглож 5:0-ийн харьцаатай ялалт байгуулсан. Хагас шигшээд шалгарч медалийн болзол хангаад буй Э.Цэндбаатар өнөөдөр мөнгөн медалийн төлөө Узбекстаны боксчин Миразизбек Мирзахалиловтой тулалдана.