Эмэгтэйчүүдийн боксын насанд хүрэгчдийн дэлхийн аварга шалгаруулах тэмцээн өчигдөр манай хойд хөрш ОХУ-ын Буриад улсын нийслэл Улаан-Үүд хотод эхэллээ. Уг тэмцээн нь Буриадад болж байгаа анхны олимпын спортын төрлийн ДАШТ юм. Улаан-Үүд хотын Биеийн тамир, спортын цогцолборт эхэлсэн тэмцээнд дэлхийн 57 орны 224 ширэн бээлийтэн оролцож байна. ДАШТ энэ сарын 13-ныг хүртэл 10 жингийн ангиллаар явагдана.

Монгол Улсаас Үндэсний эмэгтэй шигшээ багийн ахлах дасгалжуулагч Б.Пүрэв-Очир, дасгалжуулагч М.Буянжаргал, Л.Энхбаяр, багийн эмч Э.Энхбаяр нараар ахлуулсан долоон тамирчин хойд хөршийг зорьсон. AIBA-гийн гурван одтой шүүгч Г.Бадрах тэмцээнийг шүүнэ.

Манай багийн бүрэлдэхүүнд 48 кг-д 2019 оны Азийн АШТ-ий хүрэл медальт Б.Мөнгөнсаран, 51 кг-д Л.Алтанцэцэг, 54 кг-д Э.Мичидмаа, 57 кг-д Ази тивийн аварга Т.Болортуул, 60 кг-д Азийн аваргын хүрэл медальт Н.Намуун, 69 кг-д Э.Эрдэнэтуяа, 75 кг-д М.Мягмаржаргал нарын боксчид орж ринг дээр хурд хүч, ур чадвараа сорино.

Дэлхийн аваргын тэмцээний сугалаанаас сонирхуулбал, 48 кг-д Б.Мөнгөнсаран эхний тойрогт хийлсэн. Энэ жинд 20 тамирчин тулалдаж буй. Харин 54 кг-д 22 тамирчин өрсөлдөхөөс Э.Мичидмаагийн эхний учраа Энэтхэгийн тамирчин байх юм. 57 кг-д 36 тамирчин өрсөлдөх бөгөөд манай тамирчин Т.Болортуулын эхний өрсөлдөгч нь Австрийн тамирчин байгаа аж. Харин Э.Эрдэнэтуяа ОХУ-ын тамирчин С.Далгатоватай учраа таарсан бөгөөд 69 кг-д 26 тамирчин хүчээ сорих юм байна. Монголын эмэгтэй боксын ДАШТ-ий анхны медалийг М.Нандинцэцэг эх орондоо авчирсан түүхтэй. Тэрбээр 2018 онд Энэтхэг улсад болсон эмэгтэйчүүдийн ДАШТ-ий 54 кг-ийн жинд хүрэл медалийн эзэн болж Монгол Улсынхаа Төрийн далбааг мандуулсан билээ.