ОХУ-ын Улаан-Үд хотноо үргэлжилж буй эмэгтэйчүүдийн сонирхогчдын боксын 11 дэх удаагийн ДАШТ-ий гуравдахь өдөр буюу аравдугаар сарын 4-5-нд манай гурван боксчин тулаан хийлээ. 54 кг-ийн жинд Эрдэнэдалайн Мичидмаа Энэтхэгийн Жамуна Боротой тулалдаж 0:5 (27:30, 27:30, 28:29, 27:30, 27:30)-ээр ялагдсан бол, 69 кг-ийн жинд Энхбаатарын Эрдэнэтуяа ОХУ-ын Саадат Далгатовад мөн 0:5 (27:30, 27:30, 27:30, 27:30, 27:30)-ээр хожигдов. 75 кг-ийн жинд Мөнхбатын Мягмаржаргал Энэтхэгийн Кавитад 0:5 (27:30, 27:30, 27:30, 28:29, 28:29) оноогоор хожигдлоо. Эхний гурван өдөр манай таван ширэн бээлийтэн рингэнд гарснаас 51 кг-ийн жинд Л.Алтанцэцэг л ялалт байгуулсан.

Манай нэг боксчин тулаанаа хийгээгүй байгаа бөгөөд 48 кг-ийн Балсангийн Мөнгөнсаран өнөөдөр Мароккогийн Рабаб Чеддартай тулалдана. Харин 60 кг-ийн жинд Монхорын Намуун өчигдөр орой Туркийн С.Калискантай тоглож 4:1-ээр хожлоо. Харин 51 кг-ийн жинд өрсөлдөж буй Лутсайханы Алтанцэцэг маргааш Вьетнамын Нгуен Ти Тамтай хоёр дахь тулаанаа хийнэ.