Марокко улсын Марракеш хотод энэ сарын 16-нд жүдо бөхийн залуучуудын дэлхийн аварга шалгаруулах тэмцээн эхэлсэн билээ. Тэмцээний хоёр дахь өдөр буюу уржигдар эмэгтэйчүүдийн 52 кг-ын жинд Монголын тамирчин, олон улсын хэмжээний мастер Лхагвасүрэнгийн Сосорбарам түрүүллээ. Энэ оны насанд хүрэгчдийн Азийн аварга болон Дюссельдорфын Гранд Сламаас мөнгөн медаль хүртэж, дэлхийн жүдо бөх сонирхогчдын танил болсон Баянхонгор аймгийн Эрдэнэцогт сумын харьяат Л.Сосорбарам залуучуудын ДАШТ-ий аваргын алтан медалийн төлөө Тайваний Лин Шуан Шутай өрсөлдөж хоёр вазари үнэлгээ авч ялалт байгууллаа.

Манай жүдоч финалд хүрэх замдаа эхний тойрогт гоц мөргөөд, хоёрын даваандаа Европын залуучуудын аваргын мөнгөн медальт Германы Анника Вурфелийг нэмэлт цагт вазаригаар, гурвын даваанд өсвөр үеийн Азийн хошой аварга, Азийн цомын аварга Узбекистаны Сита Кадамбоеваг 3:11 минутад цэвэр, хэсгийн аваргын төлөө энэ оны Европын залуучуудын аваргын мөнгөн медальт Недерландын Наоми Ван Кревелийг торгуулиар ялсан. Улмаар хагас шигшээд энэ оны Бразилын “Их дуулга”-ын мөнгө, Бакугийн Гранд сламын хүрэл, Пан америкийн насанд хүрэгчдийн аварга Бразилийн Ларисса Пиментаг нэмэлт цагт өмсөх мэхээр вазари үнэлгээ авч тус тус ялжээ. Аваргын төлөөх барилдаанд Тайваний бөхийг өмсч эхний вазари үнэлгээ авсан бол 3:25 минутад сууж үүрэх мэхээр хоёр дахь вазари үнэлгээгээ авч цэвэр яллаа. Ингэснээр Л.Сосорбарам Монголын жүдочдоос залуучуудын дэлхийн аваргад түрүүлсэн анхны эмэгтэй боллоо. Л.Сосорбарамаас өмнө Өлзийбаярын Дүүрэнбаяр Монголын жүдочдоос залуучуудын дэлхийн аваргын алтан медалийг эх орондоо авчирч байсан юм.