Япон улсын нийслэл Токио хотноо болох спортын их наадам “Токио-2020” олимпын тоглолт эхлэхэд 420 хоног үлдээд байна. Олимпын наадам 2020 оны долдугаар сарын 22-ноос наймдугаар сарын 9-ний хооронд болно. Дэлхийн шилдэг тамирчид спортын 33 төрлөөр 19 хоногийн турш өрсөлдөнө. “Токио-2020” олимпын наадмын тэмцээн нийт 43 байршилд зохиогдох аж.

Олимпын наадмын тасалбар зарагдаж эхэлсэн ба спортын төрөл, суудлын зэрэглэлээсээ хамаараад монгол мөнгөөр 75 мянгаас гурван сая төгрөг хүртэлх үнэтэй байна. Манай монголчуудын олимпын наадмаас хамгийн олон медаль хүртсэн спортын төрөл болох чөлөөт бөхийн тэмцээн 2020 оны наймдугаар сарын 2-8-ны өдрүүдэд зохион байгуулагдана. Монголчуудын дуртай уг тэмцээний тасалбарын үнэ өдөр, суудлын зэрэглэлээсээ хамаараад зуун мянгаас сая нэг зуун мянган төгрөгийн хооронд зарагдаж байна.
Энэ жил олимпын наадмын өмнөх жил гэдэг утгаараа спортын төрөл бүрт эрхийн төлөөх өрсөлдөөн тун ширүүн өрнөж байна.