Египетийн Хургада хотын “Albatros Citadel Resort” амралтын газар Африк тивийн 2019 оны шилдгүүдийг тодруулах ёслолын үйл ажиллагаа уржигдар явагдав. Африк тивийн 2019 оны шилдэг хөлбөмбөгчин шагналыг Сенегал улсын шигшээ баг болон Английн “Ливерпүүл” клубийн довтлогч С.Мане хүртжээ. Тэрбээр клубийн хамтрагч Египет тоглогч М.Салах болон “Манчестер Сити” клубийн Алжир тоглогч Р.Махрез нартай өрсөлдөн, 477 санал авч хар тивийн шилдэг болсон байна.

 Сенегал довтлогч С.Мане өнгөрсөн улирал “Ливерпүүл” багийн хамтаар Аваргуудын лигт түрүүлж, улирлын турш 30 гоол оруулсан. Шагнал хүртсэний дараа тэрбээр “Би энэ шагналыг хүртсэндээ үнэхээр баяртай байна. Хөлбөмбөг бол миний ажил, би хөлбөмбөгт хайртай. “Ливерпүүл” клуб, шигшээ багтаа болон гэр бүлийнхэндээ баярлалаа” хэмээн ярьжээ.
Африк тивийн шилдэг хөлбөмбөгчин шагналыг Английн “Ливерпүүл” клубээс дөрөв дэх удаагаа хүртэж байгаа ба өмнө нь 2002-2005 онд тус багт тоглож байсан Сенегал довтлогч Эль-Хаж Диуф 2002 онд хүртсэн бол Египет довтлогч М.Салах 2017, 2018 онд авч байсан аж.