Монголын хөнгөн атлетикийн үндэсний шигшээ баг, “Алдар” спорт хороо, Зэвсэгт хүчний 327 дугаар ангийн тамирчин, ОУХМ Б.Мөнхзаяа Японы Осака хотод өчигдөр болсон олон улсын тэмцээнд хурдаа сорьж 12 дугаар байранд шалгаран олимпын эрх авлаа. Тэрээр “Токио-2020” олимпод оролцох болзлыг гурав дахиа биелүүлж байгаа бөгөөд  хоёр цаг, 28 минут, 3 секундын амжилтаар Монгол Улсын дээд амжилтыг шинэчлэн тогтоолоо. 17 насандаа хөнгөн атлетикийн спортоор хичээллэн, амжилтын төлөө 10 дахь жилээ зүтгэж буй Б.Мөнхзаяа өнгөрсөн оны хоёрдугаар сард Хонконгод болсон олон улсын тэмцээнд VI байрт шалгарахдаа 2019 оны ДАШТ, “Токио-2020” олимпод хурд сорих болзол хангасан юм. Улмаар дараа нь Австралид болсон “Алтан зам” ангиллын тэмцээнд урилгаар оролцохдоо олимпод өрсөлдөх болзол дахин хангасан.

 Б.Мөнхзаяа Риогийн олимпод анх хурд сорихдоо 72 дугаар байрт шалгарсан. Таван зай (3, 5, 10, 21, 42 км)-д улсынхаа дээд амжилтыг эзэмшдэг. 26 настай тэрбээр 2017 онд Тайванийн марафонд түрүүлэхдээ тус тэмцээнээс алтан медаль хүртсэн Монголын анхны, Азийн хоёр дахь тамирчин болсон юм. Б.Мөнхзаяа өдгөө бэлтгэлээ хань Б.Доржпаламынхаа  удирдлагад Япон улсад базааж байна.