Ази, Номхон далайн орнуудын боксчдод олимпын эрх олгох тэмцээн Иордан улсын Амман хотод уржигдар өндөрлөв. Эрх олгох тэмцээнд Монголын тамирчид бүтэн багаараа оролцов. Эрэгтэй найм, эмэгтэй тав, нийт 13 жинд манай боксчид олимпын эрхийн төлөө тулалдлаа.
Манай ширэн бээлийтнүүдээс эрэгтэйчүүдийн 63 кгд-д хүч үзсэн багийн ахлагч Б.Чинзориг хүрэл медаль хүртэж ганцаараа олимпын эрхийг эх орондоо авчирлаа. Бусад тамирчдын хувьд олимпын эрх хүртэж чадсангүй. Эрэгтэйчүүдийн 75 кг-д тулалдсан О.Бямба-Эрдэнэд олимпын эрхээ авах боломж байсан ч ашиглаж чадаагүй. Тэрбээр шөвгийн наймд үлдэж хүрэл медалийн төлөөх тоглолтод Филлипины боксчинд ялагдсан. Улмаар нэмэлт тоглолтод ялалт байгуулаад жиндээ олимпын тав дахь эрхийн төлөөх тулаанаа Ираны боксчинтой хийж, харамсалтай нь 2:3-ын харьцаагаар ялагдал хүлээлээ.
Энэ удаагийн тэмцээний хөнгөн жингийн эхний зургаа, дунд жингийн эхний тав, хүнд жингийн эхний дөрвөн байр эзэлсэн тамирчид “Токио 2020” олимпын наадмыг зорих эрхээ авлаа. Харин эрх авч чадаагүй тамирчид тавдугаар сард Парист болох тэмцээнд хүч үзнэ. Манай ширэн бээлийтнүүд 11 удаагийн олимпын тоглолтод оролцохдоо нэг алт, хоёр мөнгө, дөрвөн хүрэл, нийт долоон медаль хүртэж байсан түүхтэй.