Дэлхий даяар тархсан коронавирсуийн цар тахлын улмаас сүүлийн саруудад спортын уралдаан, тэмцээнүүд хойшлох нь хойшлогдож, цуцлагдах нь цуцлагдаж, нам гүмхэн байсан бол өчигдрөөс дуу чимээ орж эхэллээ. Өчигдөр АНУ-ын Флорида мужийн Жэксонвилль хотноо болох холимог тулааны UFC 249 тэмцээн зохион байгуулагдлаа.
Тэмцээний гол тулаанд Жастин Гэтжи өрсөлдөгч Тони Фергюсоныг техникийн нокаутаар буулгаж авлаа. Жастин Гэтжи эхнээсээ санаачилгыг гартаа авч зодолдов. Тавдугаар үеийн төгсгөлд хажуугийн шүүгчид тоглолтыг зогсоож Жастиныг техникийн нокаутаар ялсан гэж тооцов. Энэ удаагийн тэмцээнд Тони Фергюсоны өрсөлдөгч нь Оросын Дагестаны Хабиб Нурмагомедов байсан аж. Гэвч цар тахлын улмаас Х.Нурмагомедов Оросоос гарч чадаагүй. Тиймээс Жастин Гэтжи шинэ өрсөлдөгчөөр тодорсон.
Мөн өчигдрийн UFC 249-д Генри Сехудо Доминик Крузийг хоёрдугаар үед техникийн нокаутаар буулгаж авчээ.Мөн Фрэнсис Нганн Жаирзиньо Розенструйкийг ердөө 20 секундын дотор ялсан байна. Кэлвин Кэттар хоёрдугаар үед Жереми Стивенсийг техникийн нокаутаар дийлсэн бол, Грег Харди шүүгчдийн оноогоор Йоргана де Кастрог буулгаж авав.
Энэ удаагийн тэмцээнийг үзэгчгүй зохион явуулж телевизээр үзүүлэв. Коронавирусийн цар тахлын үед спортын уралдаан тэмцээнийг таслахгүйн тулд янз бүрийн арга, төлөвлөгөө, санаа гаргаж хамгийн идэвхтэй байсан нь UFC-ийн босс Дана Уайт. Эхлээд тэрбээр Номхон далайн аль нэг арлыг түрээслэн авч тэмцээн зохиохоор төлөвлөсөн. Дараа нь Америкийн уугуул иргэд индиануудын эзэмшил бүс нутагт (Энд АНУ-ын хууль дүрэм үйлчилдэггүй) тэмцээнээ зохиохоор бараг бэлэн болоод байхад нь “дээрээс” ярьж, болиулсан билээ. Хэдийгээр Дана “дээрээс” ярьсан хүний нэрийг хэлээгүй ч хэвлэл, мэдээллийнхэн бүгд Д.Трампыг гэж таамаглаж буй. UFC 249 тэмцээн үзэгчгүй болсон нь холбоог огтхон ч сандаргасангүй. Учир нь UFC гол орлогоо телевизийн төлбөртэй шууд дамжуулалтаас олдог. Зөвхөн энэ тэмцээнээс л гэхэд 60 сая долларын ашиг олно гэж тооцоолжээ.
UFC холбооны тэргүүн Дана Уайт CNBC-д ярилцлага өгөхдөө “Гурван сарын өмнө та бүхэн надаас миний бизнесийн талаар асуусан бол би бүх асуултад ч яг таг хариулах байлаа. Харин одоо тодорхой зүйл үнэхээр алга. Спортын нэвтрүүлэг байхгүй маш хэцүү байна. Би телевиз бараг үздэггүй, гэхдээ одоо шууд дамжуулж байвал юу ч хамаагүй үзэхэд бэлэн байна. Хүмүүс ч гэсэн уйдсан байгаа болохоор манай тэмцээнийг телевизээр их үзэх байх. Харин спортын ордонд хэзээ үзэгчтэй тэмцээн явуулах талаар би өөрийн бодолтой байгаа. Ганц долоогоод ч юм уу хэдхэн секундын дотор коронавирустэй эсэх нь гардаг тийм оношлууртай болсон цагт л би үзэгчтэйгээр тэмцээн зохион байгуулна” гэж ярьжээ.