Бразилд болж буй хөлбөмбөгийн “Копа Америка-2019” тэмцээний С хэсэгт учраа таарсан Уругвай Эквадорын шигшээ багийн тоглолт 4:0-ээр өндөрлөв. Хэдхэн хоногийн өмнө өндөрлөсөн U20 хүртэлх насны ДАШТ-ий шөвгийн 16-д хоёр улсын залуучууд учраа тааран тоглоход Эквадорын залуучууд 3:1 харьцаагаар ялалт байгуулж улмаар ДАШТ-ий хагас шигшээ хүртэл явсан. Харин “Копа Америка 2019” тэмцээнд уругвайчууд залуучуудынхаа хариуг чангахан авч Эквадорыг 4:0-ээр бут ниргэлээ. Тоглолтын зургаа дахь минутад Лодейро, 33 дахь минутад Кавани, 44 дэх минутад Суарез нар гоолдож эхний үед ялалтын хувь заяаг шийдсэн. Тэгвэл хоёрдугаар үеийн 78 дахь минутад Эквадорын Мина өөрийн хаалгандаа гоол алджээ.

Бусад тоглолтуудын хувьд А хэсэгт Бразил-Боливи - 3:0, Венесуэль-Перу - 0:0, В хэсэгт Аргентин-Колумби - 0:2, Парагвай-Катар - 2:2 гэсэн харьцаагаар өндөрлөөд байна.
“Копа Америка-2019” тэмцээнд 12 баг гурван хэсэгт хуваагдан өрсөлдөж байгаа. Өмнөд Америкийн арван баг дээр нэмэгдээд урилгаар Япон, Катарын багууд оролцож буй.
1916-1967 онд Өмнөд Америкийн аварга шалгаруулах тэмцээн нэртэйгээр зохион байгуулагддаг байсан уг тэмцээн 1975 оноос “Копа Америка” болсон түүхтэй. Өмнө нь зөвхөн Өмнөд Америк тивийн улсууд оролцдог байсан бол 1993 оноос урилгаар Ази тивийн улсуудыг оролцуулдаг болсон байна. 1916 оноос өнөөдрийг хүртэл уг тэмцээнд Уругвай 15, Аргентин 14, Бразил найм, Парагвай, Чили, Перу улсууд тус бүр хоёр, Колумби, Воливи тус бүр нэг удаа түрүүлээд байна.