Бүх Японы аварга шалгаруулах чөлөөт бөхийн тэмцээн өнгөрсөн амралтын өдрүүдэд Токио хотод явагджээ. Энэ тэмцээн нь есдүгээр сард Казахстанд болох ДАШТ-д оролцох Японы шигшээ багийг тодруулах тэмцээн байлаа. Олимпын дөрвөн удаагийн аварга Каори Ичо өнгөрсөн оны арванхоёрдугаар сард болсон Японы улсын аваргын 57 кг-ын жинд түрүүлсэн тул энэ тэмцээнд түрүүлэхэд шигшээ багт багтах байв. Гэвч тэр 57 кг-ын финалын барилдаанд “Рио 2016” олимпын 63 кг-ын жингийн аварга Рисако Кавайтай таарч, 6:4 оноогоор ялагдлаа. Ингэснээр хоёр бөх ирэх долдугаар сарын 6-нд халз барилдаан хийж, хэн хоёр ялсан нь ДАШТ-д явах эрхээ авах боллоо.

Олимпын дөрөв, дэлхийн арван удаагийн аварга Каори Ичо энэ жил 35 настай ч “Токио 2020” олимпод барилдах хүсэлтэйгээр дэвжээндээ эргэн ирсэн билээ.
Түүнчлэн эрэгтэйчүүдийн 65 кг-ын финалын барилдаан мөн сонирхолтой болжээ. Энэ жинд нийт 11 бөх барилдсанаас 2018 оны дэлхийн аварга Такүто Отогүро, Рио-2016 олимпын дэд аварга Рэй Хигүчи нар шувтаргын барилдаанд шалгараад байсан юм. Бөх сонирхогчдын эртнээс хүсч байсан уг барилдаанд хашир Рэй Хигүчи залуухан учраагаа 15:5 оноогоор цэвэр ялж шуугиан тарилаа.