Монголчуудын нас барах нэг гол шалтгаан бол элэгний өвчлөл. ДЭМБ-ын 2017 оны тайланд Hepatit B, C вирусийн өвчлөлөөр Монгол эрэгтэй хүн дэлхийн дунджаас найм дахин, эмэгтэй хүн 16 дахин их байдаг бөгөөд монголчууд үүгээрээ дэлхийд нэгт жагсдаг гэжээ.

Тэгвэл цахим орчинд өрнөж байгаа #pray4Dulguun хаштаг аян бол энэ өвчинтэй тэмцэж буй монголчуудын тэмцлийн нэг хэлбэр болж буйгаараа онцлогтой. О.Дөлгөөн бол сагсан бөмбөгийн “Этүгэн ирвэсүүд” клубийн холбон тоглогч бөгөөд дээрх өвчний улмаас АНУ-д эмчлүүлж байгаа юм. Тамирчин залуугийн эмчилгээний зардал 900 сая төгрөг болж байгаа бөгөөд өчигдрийн байдлаар аавынх нь дансанд 150 сая төгрөг цугласан гэж байв. Мөн үүнээс гадна дээрх Хаштаг аянаар дамжуулж дэлхийн спортын эрүүл мэндийн байгууллагуудаас хандив авах боломжтой гэнэ. Ингэснээр ядуу буурай орны өсөх ирээдүйтэй тамирчныг цахим орчинд гадаадын байгууллагууд анзаарч эмчилгээний зардлыг нь бүрэн даасан тохиолдол гарч байжээ. Иймээс монгол хүн бүр түүнд хайр бэлэглэх аянд нэгдсэн юм.
Дээрх аян олны хүч оломгүй далай, нийт нь нэгийн төлөө байж чадах монголчуудын чин зүрхний залбирал, нэгнээ гэсэн халуун дулаан сэтгэлийн илэрхийлэл болж чадлаа.