Бразилд болж буй хөлбөмбөгийн “Копа Америка” тэмцээний хүрэл медалийн төлөөх тоглолт уржигдар шөнө Аргентин болон Чилийн шигшээ багуудын хооронд явагдлаа. Агуэро, Дибала нарын гоолын ачаар Аргентины шигшээ өрсөлдөгчөө 2:1-ээр буулгаж авснаар хүрэл медалийн эзэн боллоо. Тоглолтын 38 дахь минутанд Чилийн шигшээ багийн ахлагч Гари Медел Арентины багийн лидер Лео Месси рүү дайран хэд хэдэн удаа мөрөөрөө хүчтэй нудрав. Энэ үед Лео Месси ямар ч хариу үйлдэл үзүүлэлгүй тайван байсан бол Медел яг л галзуурсан бух шиг дайрч санаатайгаар Мессиг өдөж зөрчил авах гэв. Гэтэл шүүгч Месси болон Медел нарт хоёуланд нь улаан хуудас өгч талбайгаас хөөв. Тоглолтын дараа шагнал гардуулах үеэр Месси талбайд гарч медалиа авсангүй. Тэрээр “Яагаад би талбайд гарч медалиа аваагүй вэ гэхээр бид энэ шившигт явдлын золиос болох ёсгүй байсан юм. Маргааш Бразил аварга болно гэдэгт би эргэлзэхгүй байна, тэд бүгдийг өөрсдийнхөө талд бэлдсэн нь тодорхой. Миний бодлоор надад улаан карт өгсөн шалтгаан нь энэ Копа Америкагийн тухай хэлсэн миний үгнүүдээс болсон байх. Би үргэлж л үнэнг хэлдэг, бас шударга байдаг” гэжээ.