Долдугаар сарын 6-нд ОХУ-ын нутгаас гараагаа эхэлсэн “Торгоны зам-2019” (Silk Way Rally) олон улсын авторалли уралдаан өнөөдөр (2019.07.16) БНХАУ-д барианд орно. Нийтдээ 5007 км урт зам туулах тамирчдын тэвчээр, хатуужлыг шалгасан уралдаан арван өдрийн турш ОХУ, Монгол, БНХАУ-ын нутгийг дайрсан юм. Уг уралдаанд 40 улсын 97 тамирчин, 54 автомашин, 16 том оврын ачааны машин, 24 мотоцикль оролцсон нь тус тэмцээний түүхэн дэх хамгийн өндөр үзүүлэлт болжээ.
Эрхүүгээс эхэлсэн уралдааны оролцогчид баяр наадмын үеэр Төв аймгийн Хөшигийн хөндийд саатсан. “Торгоны зам” ралли энэ жил анх удаа манай улсын нутагт болж байгаа. Энэ сарын 13-нд “Мандалговь-Даланзадгад”-ын чиглэлд уралдааны зургадугаар үе шат боллоо. Энэхүү үеийн уралдааны замын нийт урт 412 км бөгөөд түүний дотор тусгай зайн тэмцээний замын урт 408 км аж.
Хамгийн том бүрэлдэхүүнтэйгээр оролцож байгаа төрөл нь 54 экипаж бүхий жийп автомашинар уралдаж буй тамирчид байна. Автомашины төрөлд өнгөрсөн оны уралдааны ялагч Саудын Арабын Язид Аль-Ражи бичигджээ. Түүний гол өрсөлдөгч нь Катарын нэрт тамирчин Нассер Аль-Аттия аж. “Торгоны зам” раллигийн автомашины ангиллыг Катарын багийнхан тэргүүлсээр байгаа билээ. Тэрээр дэлхийн хамгийн алдартай уралдаан болох “Дакар”-т түрүүлж байсан шилдэг тамирчин юм. Багийн жолооч Нассер Ал Аттияагийн хувьд “Дакар” раллигийн гурван удаагийн аварга, автоспортын дэлхийн аварга, буудлагын спортоор Лондонгийн олимпоос хүрэл медаль хүртсэн нэгэн билээ. Нассер Аль-Аттиягийн яриаг хүргэж байна.

Нассер Аль-Аттия:
Монгол үнэхээр сайхан орон байна

-Өнөөдрийн уралдааны сэтгэгдлээсээ хуваалцана уу?
-Бид маш амжилттай тэмцээнээ үргэлжлүүлж байна, маш сайхан байлаа. Би их баяртай байна. Өнөөдөр бол онцгой өдөр, зохион байгуулалт маш сайтай байлаа гэж бодож байна.
-Монгол орны танд таалагдсан нь юу байв?
-Монгол бол өргөн уудам газар нутагтай, ан амьтан ихтэй сайхан орон байна.
-Таны гол зорилго юу вэ?
-Миний энэ удаагийн гол зорилго бол “Торгоны зам” раллид түрүүлэх. Өнгөрсөн жил Саудын Арабын Язид Аль-Ражид ялагдаж байсан. Энэ удаа ялалт байгуулж түүнээс даагаа нэхнэ гэж бодож байна.