Авлигатай тэмцэх газраас сар бүрийн 25-нд болдог хэвлэлийн хурал боллоо. АТГ-аас энэ сард нийтдээ найман хэргийг шүүхэд шилжүүлэх саналаа прокурорын байгууллагад хүргүүлсэн байна. Мөрдөн шалгах хэлтсээс гэмт хэргийн шинжтэй 89 гомдол мэдээлэл хянан үзэж, 22 хэрэгт хэрэг бүртгэлийн хэрэг нээх, 23 гомдол мэдээлэлд хэрэг бүртгэлийн хэрэг нээхээс татгалзах, нэг гомдол мэдээллийг харьяалалд шилжүүлжээ. АТГ-т авлига албан тушаалын хэрэгтэй холбоотой 67 хэргийг шалгаж байгаа юм байна.

Урьдчилсан сэргийлэх соён гэгээрүүлэх хэлтсийн дарга, Эрхэлсэн комиссар Т.Баярхүү  Шүүхэд шилжүүлсэн хэргүүдийг танилцууллаа.

-Эрүүл мэндийн яамны өндөр албан тушаалтнаар ажиллаж байсан О нь ажил үүргээ гүйцэтгүүлсэн ААН-тэй хувийн харилцаа үүсгэж  өөртөө болон бусдад давуу байдал үүсгэсэн хэрэг,

-Нийслэлийн авто төлөвлөлт ерөнхий төлөвлөгөөний газрын хэлтсийн даргаар ажиллаж байсан Н нь гэрчилгээ гаргах албаны чиг үүргээ гүйцэтгэхдээ бусдаас 20 сая төгрөгийн хахууль авсан хэрэг,

-Хан-Уул дүүргийн нийгмийн даатгалын хэлтсийн даргаар ажиллаж байсан С нь нэр бүхий иргэдэд нийгмийн даатгалын сангаас тэтгэвэр тэтгэмж олгохдоо үндэслэлгүйгээр илүү тогтоож хээл хахууль шан харамж авсан, өгсөн гэх хэрэг,

-Баянзүрх дүүргийн харьяа болон харьяаллын бус, мөн харьяалалтай хүүхдийг цэцэрлэгт авахгүй гэж хясан боогдуулж, бусдаас хахууль авсан БСШУЯ-ны ... дугаар цэцэрлэгийн удирдах албан тушаалтанд холбогдох хэрэг,

-Төрийн банкинд ажиллаж байсан удирдах албан тушаалтнууд 4.7 тэрбум төгрөгийн зээл гаргахдаа хахууль өгч, хийх ёстой үйлдлээ хийхдээ 98 мянган ам.долларын хахууль авсан хэргийг тус тус шүүхэд шилжүүлэх саналыг хүргүүлээд байна гэлээ.