Улсын Дээд шүүхийн шүүгч П.Соёл-Эрдэнийг шүүгчийн ёс зүйн дүрмийг зөрчиж  алдаа хийсэн байж болзошгүй гэх үндэслэлээр Шүүхийн Сахилгын хорооны хурлаар авч хэлэлцэн шалгахаар болжээ.

Тодруулбал, “БЦ” /Компанийн нэрний товчлол/ ХХК-иас Улсын Дээд шүүхийн Ерөнхий шүүгчид хандан “Барилгын тухай хуулийн 40 дүгээр зүйл, Захиргааны хэрэг шүүхэд хянан шийдвэрлэх тухай хуулийн 131.1 дэх хэсгийг зөв хэрэглэх талаар албан ёсны тайлбар гаргуулахаар ханджээ. Шүүгч П.Соёл-Эрдэнэ нь уг компанийн хүсэлтэд хариу өгөхдөө 2018 оны өөр компанийн нэхэмжлэлтэй хэргийн гаргасан шийдвэрийг дурдаж “Адил төрлийн маргаанд адилтган хэрэглэх боломжтой” гэсэн утга бүхий хариу өгсөн байна. Гэтэл уг хэрэгтэй холбоотойгоор Улсын Дээд шүүхийн Захиргааны хэргийн танхимын нийт шүүгчийн хуралдаанаар “Хууль тайлбарлахгүй” гэдэг саналыг танхимын шүүгчид дэмжсэн байтал шүүгч П.Соёл-Эрдэнэ нь шүүх танхимын шүүгчдийн гаргасан саналыг үл хэрэгсэж, дур мэдэн 2018 оны хаа хамаагүй хэргийн шийдвэрийг дурдаж, адилтган үзнэ гэсэн утга бүхий бичиг гаргаж өгсөн нь зориуд санаатайгаар бусдад давуу байдлыг олгосон гэсэн хардлагыг илэрхий төрүүлэхээр байгаа юм.

Ийнхүү шүүгч П.Соёл-Эрдэнэ нь  Монгол Улсын Үндсэн хууль, Шүүхийн тухай хууль, Шүүгчийн эрх зүйн байдлын тухай хууль болон шүүгчийн ёс зүйн дүрэм гэх мэт олон хуулийн заалт, дүрмийг  ноцтойгоор зөрчсөн гэсэн үндэслэлээр шалгагдахаар болжээ.

Дээд шүүхийн шүүгч П.Соёл-Эрдэнэтэй холбоотой Сахилгын хорооны хурал энэ лхагва гаригт буюу зургадугаар сарын 08-ны өдөр болно. Сүүлийн үед нэр хүнд нь өсч, шударга шийдвэр гаргаж байгаа хэмээн иргэдээс магтаал сонсох болсон Дээд шүүх  алдаа гаргасан  шүүгчдээ хариуцлага тооцож чадах эсэхийг харах л үлдлээ.

Эх сурвалж: ӨДРИЙН СОНИН