Монгол Улсын дээд шүүхийн шүүгч Б.Батцэрэн, Д.Эрдэнэбалсүрэн нар НҮБ-ын Дур зоргоор саатуулах асуудал хариуцсан Ажлын хэсгийн гишүүн Мэтью Жиллетт, Элина Штайнерте нарыг 2022 оны 10 дугаар сарын 4-ний өдөр хүлээн авч уулзлаа.

НҮБ-ын Дур зоргоор саатуулах асуудал хариуцсан Ажлын хэсэг эрх чөлөөгөө хасуулахтай холбоотой асуудалд олон улсын стандарт хэрэгжүүлэхэд Монгол Улсын Засгийн газарт зөвлөх, хамтран ажиллах болон хууль тогтоох, гүйцэтгэх, шүүх эрх мэдлийн байгууллагын төлөөлөгчидтэй уулзаж, холбогдох байгууллагуудад ажиллах зорилготой байгааг Ажлын хэсгийн гишүүн Элина Штайнерте уулзалтын эхэнд танилцуулав.

Улсын дээд шүүхийн шүүгчид Эрүүгийн хэрэг хянан шийдвэрлэх ажиллагааны хүрээнд хүнийг баривчлах, цагдан хорих таслан сэргийлэх арга хэмжээ авах үндэслэл, хугацааны талаарх хуулийн зохицуулалт болон хэрэгжилт, түүнчлэн хууль тогтоомжийг боловсронгуй болгох чиглэлээр хүлээгдэж байгаа зүйлс зэрэг асуудлыг танилцуулж, Ажлын хэсгийн гишүүдийн сонирхсон асуултад хариуллаа.

Ажлын хэсэг ирэх онд НҮБ-ын Хүний эрхийн зөвлөлд нэгдсэн тайлан танилцуулах  аж.

Уулзалтад НҮБ-ын Хүний эрхийн дээд комиссарын газрын Хүний эрхийн мэргэжилтэн Маргарита Нечаева, Улсын дээд шүүхийн Гадаад харилцаа, хамтын ажиллагааны албаны дарга Д.Тулга нар байлцлаа.