Монгол Улсын саалийн үнээ гэгддэг “Эрдэнэт” үйлдвэрийн 49 хувийн маргаан одоог хүртэл үргэлжилсээр л байна. Төр өмчөө эргүүлэн авах асуудал өнгөрөгч 2017 оноос эхлэлтэй боловч өнөөдрийг хүртэл шийдэгдэж чадаагүй нь үнэхээр харамсалтай.

Монгол Улс, Монгол Улсын Засгийн газар төрийн өмчөө эргүүлэн авах гэж маш их цаг хугацаа зарцуулж байгаагийн шалтгааныг ЗГХЭГ-ын дарга Д.Амарбаясгалан Засгийн газрын нэхэмжлэлтэй шүүх рүү шилжсэн хэргүүдийн явцын мэдээллийг танилцуулах үеэрээ олон нийтэд мэдээлсэн юм. Тэрбээр, “Эрдэнэт үйлдвэр”-ийн 49 хувьтай холбоотой асуудал анх 2017 онд үүсч төр иргэний хооронд маргаан үүсэх процесс явагдсан. 2022 оны арванхоёрдугаар сард хэргийг прокурорт шилжүүлсэн байтал 2023 оны гуравдугаар сард тус хэргийн гол оролцогч Д.Эрдэнэбилэгийг Монгол Улсын хилээр гарах хоригийг цуцлаад улмаар Сүхбаатар дүүргийн анхан шатны шүүхийн шүүгчийн захирамжаар 14 хоног гадагш явах зөвшөөрөл олгосон байдаг. Үүнтэй холбоотойгоор Д.Эрдэнэбилэг өнөөдрийг хүртэл буцаж ирээгүй. ЗГХЭГ-аас шүүх, прокурорын түвшинд асуудлыг удаа дараа тавьсны үндсэн дээр 3 тэрбум төгрөгийн барьцаатайгаар 14 хоног гадагш гарах шүүгчийн захирамжийг цуцалж, хилээр орж ирэхэд нь баривчлах шийдвэр анхан шатны шүүхээс гаргасан. Гэвч энэ хэргийн гол оролцогч Б.Эрдэнэбилэг байхгүй учраас цаашид Прокурорын байгууллага шүүхэд шилжүүлэх процесс нь үргэлжлэх боломжгүй болсон.

Тиймээс Хэрэг эрхлэх газрыг төлөөлж байгаа өмгөөллийн баг бүрэлдэхүүнээ өргөтгөөд энэ асуудал дээр илүү Засгийн газар илүү анхаарал тавьж ажиллахгүй бол Монголын ард түмний өмнө шударга ёс тогтоох, олон нийтийн бухимдлыг төрүүлсэн асуудлыг үнэн мөнийг нь олох нь зөв гэж хандсан. Ингээд 22 оролцогчтой том хэргийг хоёр тусгаарлах шийдвэрийг прокурорын байгууллагаас гаргаж шүүхэд хандсан. Монгол Улсад ирэхгүй байгаа этгээдийг хэргийг тусгаарлаж, бусад оролцогчийн хэргийг шүүхэд шилжүүлсэн. Шүүх хэргийг хүлээж авч, 330 орчим хавтаст хэрэгтэй сар орчим танилцаж, гэм буруугийн шүүх хурлыг зарлана гэсэн мэдээлэл ирсэн" гэсэн юм.

Тус хэрэг шүүхээр эцэслэн шийдэгдээд монголчууд баялагтаа эзэн болж чадах эсэхийг арваннэгдүгээр сарын 21-нд шийдэгдэхээр болжээ.