Тагнуулын ерөнхий газрын дарга асан Б.Хурц, Улсын ерөнхий прокурорын орлогч асан Г.Эрдэнэбат нарын нэр бүхий есөн хүнд холбогдох хэргийн шүүх хурал өчигдөр Төв аймгийн сум дундын Эрүүгийн хэргийн анхан шатны шүүхэд боллоо. 

Шүүх хуралд хохирогчоор Б.Содномдаржаа, Т.Чимгээ нар, гэрчээр С.Зориг агсны гэргий Б.Булган нар оролцсон юм. Энэ үеэр шүүгдэгч нарын өмгөөлөгчийн зүгээс хохирогч Б.Содномдаржаа, Т.Чимгээ нартай хамт шүүхээс ял авсан Ц.Амгаланбаатарыг шүүх хуралд оролцуулах хүсэлт гаргасан тул Ц.Амгаланбаатар 14:00 цагийн үед ирсэн билээ.
Шүүхээс төр, нийгмийн зүтгэлтэн С.Зоригийг хөнөөсөн хэргээр гурван шатны шүүхээс ял аваад буй Т.Чимгээ, Б.Содномдаржаа нарыг мөрдөн байцаалтын явцад эрүүдэн шүүсэн гэх үндэслэлээр ТЕГ-ын дарга асан, хошууч генерал Б.Хурц нарыг өнгөрсөн сард саатуулсан юм. Шүүх хурал завсарлах үеэр сэтгүүлчид Б.Хурцаас “Эрүүдэн шүүх тушаалыг та өгсөн үү" хэмээн асуухад "Тийм зүйл байхгүй" гэсэн юм.

Мөн Б.Хурцын өмгөөлөгч Г.Батбаяр “Маш нууц зэрэглэлтэй хэрэг учир эрүүдэн шүүсэн гэх хэрэгт холбогдсон есөн хүний нэгийг нь өмгөөлж байгаа. Т.Чимгээ, Б.Содномдаржаа нарыг эрүүдэн шүүсэн гэх этгээд нь хоригдол Ц.Амгаланбаатар шүү дээ. Үүнийг мэдсээр байж мөрдөн байцаагчид буруутай мэтээр иргэдэд ойлгуулж болохгүй. Хамгийн гол нь эрүүдэн шүүх боломж олгосон гэдгийг нотлох ёстой. Ер нь ганц зүйлийг ойлгох хэрэгтэй. Энд мөрдөн байцаах ажиллагаа явагдаагүй. Нууц баримт, мэдээллийг олох тагнуулын үйл ажиллагаа явагдсан. Тиймээс үүнийг ялгаж, салгаж ойлгох хэрэгтэй. Гэтэл өнөөдөр онц хүнд гэмт хэргийг илрүүлсэн хуулийнхныг буруутгаж байна. Тиймээс энэ хэргийг хэрэгсэхгүй болгохын төлөө ажиллах болно” гэв.

Дашрамд сонирхуулахад, Б.Хурц, Г.Эрдэнэбат нарыг Эрүүгийн хуулийн доорх заалтыг зөрчсөн хэмээн үзэж байгаа юм байна.
133 дугаар зүйл.Гүйцэтгэх ажлын тухай хууль тогтоомж зөрчих
133.1.Гүйцэтгэх ажлын тухай хууль тогтоомжоор хориглосон үйл ажиллагаа явуулсан бол хөдөлмөрийн хөлсний доод хэмжээг тавин нэгээс нэг зуу дахин нэмэгдүүлсэнтэй тэнцэх хэмжээний төгрөгөөр торгох, гурваас дээш зургаан сар хүртэл хугацаагаар баривчлах, эсвэл гурван жил хүртэл хугацаагаар хорих ял шийтгэнэ.
251 дүгээр зүйл. Эрүү шүүлт тулгах
251.1.Хэрэг бүртгэгч, мөрдөн байцаагч хүч хэрэглэж буюу хүч хэрэглэхээр заналхийлэх, тарчилган зовоох, тохуурхан даажигнах, хуурч мэхлэх зэрэг хууль бус арга хэрэглэж мэдүүлэг өгөхийг албадан эрүү шүүлт тулгасан бол тодорхой албан тушаал эрхлэх, үйл ажиллагаа явуулах эрхийг гурван жил хүртэл хугацаагаар хасч таван жил хүртэл хугацаагаар хорих ял шийтгэнэ.