“Mercedes-Benz” шинээр худалдаанд гаргахаар зэхэж байгаа цахилгаан автомашиныхаа концепц загвараа Франкфуртын автошоуны үеэр танилцууллаа. “Mercedes”-ийг эзэмшигч “Daimler” 2022 он гэхэд нийт автомашин үйлдвэрлэлийнхээ 10 хувийг цахилгаан цэнэг хураагуураар ажилладаг болгохоор зорьж байгаа юм.
Энэ нь Европын Холбооны шаардлагад нийцүүлэх алхам болж байгаа ч хэрэглэгчдийн эрэлтийг хүчилж болохгүй учир компанид томоохон сорилт болж байгааг “Daimler”-ийн гүйцэтгэх захирал онцоллоо. Олон арван жилийн турш “Mercedes”-ийн орлогын гол эх үүсвэр нь хөрөнгөтнүүд болон улстөрчдийн ихээр сонирхдог “S-Class” загвар байсаар ирсэн юм. Иймд хүлэмжийн хийг бууруулах шаардлагаас үүдэн хүчирхэг, хүнд оврын седан загваруудын ирээдүй бүрхэг болж байна. “Mercedes” шинэ концепц загварыг хэзээ худалдаанд гаргахаа мэдэгдээгүй ч нэг цэнэглэлтээр 700 км орчим явах чадалтайг мэдээллээ. Түүнчлэн 20 минутад 80 хувь хүртэл цэнэглэдэг, хурдны зам дээр өөрөө жолоодох чадвартай байх юм. Энэхүү автомашины дотоод заслыг дахин боловсруулсан хуванцар сав, дээврийг далайн хог хаягдлаар хийсэн байна.